ဇန်နဝါရီ ၄ – ၂၀၂၅
GG (VOM)
၂၀၀၈ ဖွဲ့စည်းပုံအခြေခံဥပဒေ ရေးဆွဲနိုင်ရန် အသေးစိတ်အခြေခံ မယ့်မူတွေ ချမှတ်နိုင်ရေးအတွက် အမျိုးသားညီလာခံမှာပါဝင်ဆွေးနွေးခဲ့ကြတဲ့ ညီလာခံကိုယ်စားလှယ် ၂၄၉ ယောက်ကိုဂုဏ်ထူးဆောင်တံဆိပ် လူမှုထူးချွန်(ပထမအဆင့်)ဆုတွေချီးမြှင့်တာဖြစ်ကြောင်း နစကရဲ့ ဒီနေ့ထုတ်ပြန်ချက်မှာ ဖော်ပြထားပါတယ်။
တိုင်းရင်းသားပါတီတွေကနိုင်ငံရေး ခေါင်ဆောင်တွေဖြစ်တဲ့ ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ(SNLD) မှ ဦးခွန်ထွန်းဦး၊ ဦးစိုင်းညွန့်လွင် အပြင် မွန်တိုင်းရင်းသားနိုင်ငံရေးခေါင်းဆောင်တွေဖြစ်တဲ့ နိုင်ချေမွန်၊ နိုင်တလမွန်၊ နိုင်ဧကတို့ကို နစကမှ စွမ်းဆောင်မှုဆိုင်ရာ ဂုဏ်ထူးဆောင်တံဆိပ် လူမှုထူးချွန်(ပထမအဆင့်)ဆုတွေချီးမြှင့်ခံရသူတွေထဲမှာ ပါဝင်နေပါတယ်။
ဂုဏ်ထူးဆောင်တံဆိပ် လူမှုထူးချွန်(ပထမအဆင့်)ဆုတွေချီးမြှင့်ခံရတဲ့အထဲမှာ ဦးခွန်ထွန်းဦး အပါအဝင် လူပုဂ္ဂိုလ်အချို့ကတော့ ကွယ်လွန်ခဲ့ပြီဖြစ်ပါတယ်။
” အမျိုးသားညီလာခံမှာ တက်ခဲ့တဲ့သူတွေဆိုပြီးအကြောင်းပြထားတယ်။ အမျိုးသားညီလာခံကနေ နေအခြေခံမူတွေချမှတ်ခဲ့တယ်။ အဲဒီတုန်းက ဦးစိုင်းညွန့်လွင်တို့ဦးခွန်ထွန်းဦးတို့ပါတီက တောက်လျှောက်ကန့်ကွက်ခဲ့တာ။ သတ်မှတ်တာတို့စနစ်တွေပေါ့။ အမျိုးသားညီလာခံမှာတက်တဲ့သူတိုင်းလည်း မဟုတ်ဘူး။ညီလာခံမှာတက်ခဲ့ပြီး အခုလတ်တလောငွေဆောင်အစည်းအဝေးမှာ တက်ခဲ့တဲ့ဆက်နွယ်သူတွေကို ပေးလိုက်တာတွေ့ရတယ်။ တမင်ပေးတယ်ထင်တယ်။ အရင်ကထူးချွန်ပထမ၊ဒုတိယ၊တတိယဆုတွေဆို သေတဲ့သူတွေမပေးဘူး။ အခုကသေတဲ့သူတွေပါလာတယ်။ ပါလာတော့ ကျန်ရစ်တဲ့မိသားစု အကျိုးခံစားခွင့်ရှိတာပေါ့။ ” လို့ နိုင်ငံရေးသမားတယောက်က သုံးသပ်ပြောပါတယ်။
ဂုဏ်ထူးဆောင်တံဆိပ် လူမှုထူးချွန်(ပထမအဆင့်)ဆုချီးမြင့်ခံရတဲ့ ဦးစိုင်းညွန့်လွင်ရဲ့ SNLD ပါတီဟာဆိုရင် မှတ်ပုံတင်ခွင့်ပယ်ဖျက်ခံထားရပါတယ်။ဦးခွန်ထွန်ဦးဆိုရင် ၂၀၂၂ ခုနှစ်က ကွယ်လွန်ခဲ့တာဖြစ်ပါတယ်။
၂၀၀၈ ဖွဲ့စည်းပုံအခြေခံဥပဒေ ရေးဆွဲနိုင်ရေးအတွက်အမျိုးသားညီလာခံကိုတော့ ၁၉၉၃ ခုနှစ်မှစပြီး ၂၀ဝ၈ ခုနှစ် မှာအပြီးသတ်ကျင်းပနိုင်ခဲ့ပြီး ၂၀၀၈ ခုနှစ် မေ ၁၀၊ ၂၄ ရက်နေ့မှာတော့ အခြေခံဥပဒေ မူကြမ်းကို ပြည်လုံးကျွတ် ဆန္ဒခံယူပွဲ ကျင်းပပြီး အတည်ပြုနိုင်ခဲ့တယ်လို့သိရပါတယ်။
၂၀၀၈ ဖွဲ့စည်းပုံအခြေခံဥပဒေကိုတော့ လက်ရှိ နစက လက်ထက်မှာလည်းကျင့်သုံးနေဆဲဖြစ်ပါတယ်။
