ဝါရှင်တန်၊ ဇန်နဝါရီ-၉-၂၀၂၅
မျိုးဆက်(VOM)
မြောက်ကိုရီးယားတပ်တွေဟာ ယူကရိန်းစစ်ပွဲမှာ ရုရှားနဲ့အတူ တိုက်ပွဲဝင်နေမှုကနေ အကျိုးအမြတ်တွေရရှိနေပြီး အိမ်နီးချင်းနိုင်ငံတွေကို စစ်တိုက်နိုင်စွမ်း ပိုရှိလာတယ်လို့ အမေရိကန်က သတိပေးလိုက်ပါတယ်။
၂၀၂၂ ခုနှစ် ဖေဖော်ဝါရီလမှာ ယူကရိန်းကို ရုရှားက ကျူးကျော်တိုက်ခိုက်ပြီးနောက် ရုရှား-မြောက်ကိုရီးယား ဆက်ဆံရေးဟာ ပိုမိုနီးကပ်လာခဲ့ပြီး လက်ရှိမှာတော့ ရုရှားမှာ မြောက်ကိုရီးယားတပ်ဖွဲ့ဝင် ၁၂၀၀၀ ကျော်ထိ ရှိနေပါတယ်။
မြောက်ကိုရီးယားဟာ ရုရှားဆီကနေ စက်လက်နက်နည်းပညာ၊ အတွေ့အကြုံတွေကနေ သိသာထင်ရှားတဲ့ အကျိုးအမြတ်တွေရနေပြီး အိမ်းနီးချင်းနိုင်ငံတွေကို စစ်တိုက်နိုင်စွမ်းရှိလာတယ်လို့ ကုလသမဂ္ဂဆိုင်ရာ အမေရိကန်သံအမတ်ကြီး ဒိုရိုသီကမ်မေးရှီရာက သတိပေးပါတယ်။
ဒါအပြင် စစ်ရေးစွမ်းရည်တိုးတက်လာတာကို အသုံးပြုပြီး မြောက်ကိုရီးယားဟာ ကမ္ဘာတစ်ဝန်း လက်နက်ရောင်းချမှုနဲ့ စစ်ရေးဆိုင်ရာ စာချုပ်တွေကို တိုးမြှင့်ဖို့ လုပ်ဆောင်လာနိုင်တယ်လို့ သံအမတ်ကြီးက ကုလသမဂ္ဂလုံခြုံရေးကောင်စီမှာ ပြောဆိုခဲ့ပြီး မကြာသေးမီက ဒုံးပျံစမ်းသပ်မှုကိုလည်း ဝေဖန်ခဲ့ပါတယ်။
နိုင်ငံရဲ့ ခုခံကာကွယ်ပိုင်ခွင့်အတွက် ဒုံးကျည်စမ်းသပ်မှုဟာ တရားမျှတတယ်လို့ မြောက်ကိုရီးယား သံအမတ်ကြီး ကင်ဆောင်ကဆိုပါတယ်။ အမေရိကန်ဟာ စံနှုန်းနှစ်ခုကျင့်သုံးနေတယ်လို့လည်း သူကပြောပါတယ်။
ဂါဇာမှာ အရပ်သား ၄၅၀၀၀ ကျော်သေဆုံးခဲ့တာမှာ အစ္စရေးရဲ့ လုပ်ရပ်တွေကို ခုခံကာကွယ်ခွင့်လို့ သတ်မှတ်ထားပြီး မြောက်ကိုရီးယားက ကိုယ့်ကိုကိုယ် ကာကွယ်ပိုင်ခွင့်တရားဝင်ကျင့်သုံးမှုအပေါ် ပြသနာရှာနေတယ်လို့ သူက ထုတ်ဖော်ပြောဆိုပါတယ်။
Ref:Reuters
Photo:Reuters
