ဂါဇာစီးတီး၊ ဇူလိုင်-၁၄-၂၀၂၅
ရတီ(VOM)
ဂါဇာအလယ်ပိုင်းမှာ သောက်သုံးရေရယူဖို့ စောင့်ဆိုင်းနေသူတွေကို အစ္စရေးက မှားယွင်းပစ်ခတ်ခဲ့လို့ ကလေးငယ် ခြောက်ယောက်အပါအဝင် လူ ၁၀ ယောက်သေဆုံးခဲ့တယ်လို့ ဂါဇာတာဝန်ရှိသူတွေက ပြောပါတယ်။
သူတို့တွေရဲ့ ရုပ်အလောင်းတွေကို နူဆီရက်အယ်အာဒါ ဆေးရုံကို ပို့ဆောင်ခဲ့ပြီး ကလေးခုနှစ်ယောက်အပါအဝင် ဒဏ်ရာရသူ ၁၆ ယောက်ကို ဆေးရုံမှာ ကုသပေးနေတယ်လို့ ဆရာဝန်တယောက်က ပြောပါတယ်။ အယ်လ်နူဆီရက် ဒုက္ခသည်စခန်းရှိ ရေပေးဝေရေးနေရာမှာ စောင့်ဆိုင်းနေတဲ့ လူအုပ်ကို အစ္စရေးဒရုန်းတစင်းက ပစ်မှတ်ထား တိုက်ခိုက်ခဲ့တာလို့ မျက်မြင်သက်သေတွေက ပြောပါတယ်။
သေဆုံး ဒဏ်ရာရတာတွေနဲ့ပတ်သက်ပြီး သတင်းတွေရရှိထားကြောင်း၊ အကြမ်းဖက်သမားတွေကို ပစ်ခတ်လိုက်တဲ့ ဒုံးကျည်ဟာ ပစ်မှတ်ကနေ မီတာများစွာအကွာမှာ ကျရောက်ပေါက်ကွဲခဲ့ပြီး ဒါဟာ နည်းပညာဆိုင်ရာ အမှားအယွင်းကြောင့်လို့ အစ္စရေးစစ်တပ်က ဆိုပါတယ်။
အစ္စရေးအနေနဲ့ အရပ်သားတွေ ထိခိုက်မှုအနည်းဆုံးဖြစ်အောင် စစ်ဆင်ရေးတွေကို ဆောင်ရွက်နေပြီး ထိခိုက်မှုမှန်သမျှအတွက် ဝမ်းနည်းစိတ်မကောင်းရကြောင်း ပြောပါတယ်။ လက်ရှိဖြစ်စဉ်နဲ့ပတ်သက်ပြီး စုံစမ်းစစ်ဆေးမှုတွေ လုပ်ဆောင်နေတယ်လို့ ဆိုပါတယ်။
ဂါဇာအပစ်အခတ်ရပ်စဲရေး ညှိနှိုင်းဆွေးနွေးမှုတွေ ရှေ့မတိုးနောက်မဆုတ် ဖြစ်နေချိန်မှာပဲ အစ္စရေးဟာ ဂါဇာမှာ စစ်ဆင်ရေးတွေကို အရှိန်မြှင့်လု်ပဆောင်နေပါတယ်။ ဂါဇာအလယ်ပိုင်း အဆောက်အအုံတခုကို မနေ့ကဖြစ်ပွားခဲ့တဲ့ သီးခြားတိုက်ခိုက်မှုအတွင်း ပါလက်စတိုင်း ၁၉ ယောက် သေဆုံးခဲ့ပါတယ်။
စနေနေ့ကလည်း ဒုက္ခသည်စခန်းတခုမှာ ရိက္ခာယူဖို့ ကြိုးစားစဉ် အစ္စရေးတပ်ဖွဲ့ဝင်တွေရဲ့ ပစ်ခတ်မှုကြောင့် လူ ၂၄ ယောက်သေဆုံးခဲ့တယ်လို့ နာဆာဆေးရုံ တာဝန်ရှိသူတွေက ပြောပါတယ်။ ဒီအတောအတွင်း အပစ်အခတ်ရပ်စဲရေးနဲ့ပတ်သက်ပြီး ကာတာမှာ တဆင့်ခံဆွေးနွေးမှုတွေ ပြိုလဲလုနီးဖြစ်နေတယ်လို့ ဖြန်ဖြေသူတွေက ထုတ်ဖော်ပြောဆိုထားပါတယ်။
Ref:BBC
Photo:Getty Images
