ဇူလိုင် ၂၄ – ၂၀၂၅
SN (VOM)
ရန်ကုန်တိုင်းအတွင်းက မြို့နယ်တချို့မှာ ဒီကနေ့ ဇူလိုင် ၂၄ ရက် မနက်ပိုင်းက လေပြင်း တိုက်ခတ်ခဲ့တာကြောင့် ကွန်တိန်နာကားတွေ တိမ်းမှောက် ပျက်စီးခဲ့ပြီး သစ်ပင်တွေလည်း လဲကျခဲ့တယ်လို့ မြန်မာနိုင်ငံ မီးသတ်တပ်ဖွဲ့နဲ့ မြို့နေ ပြည်သူတွေဆီက သိရပါတယ်။
ရန်ကုန်တိုင်းအတွင်းမှာ မနေ့ ဇူလိုင် ၂၃ ရက်၊ ညပိုင်းမှ စတင်ကာ လေပြင်း တိုက်ခိုက်ခဲ့တာဖြစ်ပြီး အခု မနက်ပိုင်းမှာတော့ ဗိုလ်တထောင် စည်ပင်ဝင်းအတွင်း ရပ်နားထားတဲ့ ကွန်တိန်နာကား တစီး တိမ်းမှောက်ကာ တချို့ကားတွေလည်း ပျက်စီးတဲ့အထိ ဖြစ်ခဲ့တယ်လို့ မျက်မြင် တွေ့ရှိသူတွေက ပြောပါတယ်။
“ဒီနေ့မနက် ၇ နာရီကျော်လောက်က ဖြစ်သွားတာပါ။ ကွန်တိန်နာကားတွေ တော်တော်များများ ပျက်စီးကုန်တယ်။ ကုန်ကားကြီးတွေပါ တုံးလုံးလဲသွားတဲ့အထိ လေကပြင်းတယ်။ ကားတွေ ဆယ်စီးလောက်တော့ ထိခိုက်မှုရှိတယ်” လို့ မျက်မြင် တွေ့ရှိသူတယောက်က ပြောပါတယ်။
ဒါအပြင် လေပြင်းကြောင့် ကွန်တိန်နာ တချို့လည်း ပြိုကျခဲ့သလို စည်ပင်ဝင်းထဲက သစ်ပင်တွေလည်း လဲကျခဲ့တယ်လို့ သိရပြီး အဆိုပါဖြစ်စဉ်အတွင်း လူထိခိုက် ဒဏ်ရာရမှုတော့ မရှိခဲ့ဘူးလို့ ဆိုပါတယ်။
“ဗိုလ်တထောင် ICD (1/2) Container Yard မှာရှိတဲ့ ကွန်တိန်နာပုံးတွေတောင် ပြိုကျကုန်တယ်။ ပေ ၄၀၊ ပေ ၂၀ ၊ အနံက ၈ ပေ၊ ၇ ပေ၊ အမြင့် ၈ ပေလောက်ရှိတဲ့ ကွန်တိန်နာပုံးကြီးတွေတောင် ပြိုကျတဲ့အထိ လေက အရမ်းကြမ်းတာ။ ဒလဘက်က သွပ်တွေပါ ကားဝင်းထဲရောက်လာတာ” လို့ ဗိုလ်တထောင်ဝင်းအတွင်း ရောက်ရှိနေသူက ပြောပါတယ်။
ဒါအပြင် လေပြင်းကြောင့် မှော်ဘီ၊ ဒေါပုံ၊ ဒလ၊ မင်္ဂလာဒုံ၊ ရန်ကင်း၊ သာကေတ၊ သန်လျင်၊ ဒဂုံမြို့သစ် (ဆိပ်ကမ်း) စတဲ့ မြို့နယ် ရှစ်မြို့နယ်က သစ်ပင် အများအပြားလည်း လဲကျခဲ့တယ်လို့ မြန်မာနိုင်ငံ မီးသတ်တပ်ဖွဲ့က သတင်း ထုတ်ပြန်ထားပါတယ်။
“မင်္ဂလာဒုံဘက်မှာ သစ်ပင်တွေလဲကျပြီး လမ်းတွေပိတ်ကုန်တာ။ လမ်းဘေး ဓာတ်တိုင်က မီးကြိုးတွေရော၊ ဝိုင်ဖိုင်ကြိုးတွေရော ကားတွေပေါ် ပြုတ်ကျလာတယ်။ လူတွေ ဘာမှမဖြစ်လို့ တော်သေးတယ်” လို့ ကိုယ်တွေ့ ကြုံခဲ့ရသူ တယောက်က ပြောပါတယ်။
မိုးလေဝသနှင့် ဇလဗေဒ ညွှန်ကြားမှုဦးစီးဌာနရဲ့ မနေ့ ဇူလိုင် ၂၃ ရက်၊ ည ၇ နာရီအချိန် ထုတ်ပြန်ထားတဲ့ အထူးမိုးလေဝသသတင်း အသိပေးချက်မှာ အခုရက်ပိုင်းအတွင်း တိုင်းနဲ့ ပြည်နယ်တချို့မှာ မိုးကြီးမှု၊ ရေကြီးရေလျှံမှု၊ လေပြင်း တိုက်ခတ်မှုတွေ ဖြစ်ပေါ်နိုင်တယ်လို့ ဖော်ပြထားပါတယ်။
လာအိုနိုင်ငံနဲ့ မြန်မာနိုင်ငံ အရှေ့ပိုင်းနယ်စပ် ဒေသတွေကို ဖြတ်ကျော်နေတဲ့ လေဖိအားနည်းဆဲလ်ရဲ့ အရှိန်ကြောင့်အပြင် ဒီကနေ့ ဇူလိုင် ၂၄ ရက်နေ့မှာ ဘင်္ဂလားပင်လယ်အော် မြောက်ပိုင်းမှာ ဖြစ်ပေါ်လာနိုင်တဲ့ လေဖိအားနည်းရပ်ဝန်းရဲ့ အရှိန်ကြောင့်လည်းကောင်း၊ ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာမှ အားအလွန် ကောင်းနေခြင်းတို့ကြောင့်လည်းကောင်း မနေ့ ဇူလိုင် ၂၃ ရက်၊ ညပိုင်းကနေစပြီး ၂၈ ရက်နေ့အတွင်း တိုင်းနဲ့ ပြည်နယ်တချို့မှာ မိုးရွာသွန်းမှုတွေ ဖြစ်ပေါ်နိုင်တယ်လို့ သိရပါတယ်။
မိုးရွာသွန်းနိုင်တဲ့ ဒေသတွေနဲ့ မိုးရွာသွန်းမှု အခြေအနေတွေကတော့ နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ်တို့မှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး ဒေသအလိုက်နဲ့ နေရာကွက်ပြီး မိုးကြီးနိုင်တယ်လို့ သိရပါတယ်။
ဒါအပြင် မြန်မာ့ကမ်းရိုးတန်း တလျှောက်နဲ့ ကမ်းလွန် ပင်လယ်ပြင်တို့မှာလည်း မကြာခဏ မိုးသက်လေပြင်းတွေ ကျရောက်ပြီး လှိုင်းအလွန်ကြီးနိုင်တယ်လို့ သိရပါတယ်။
မိုးသက်လေပြင်းကျစဉ် ရေပြင်/မြေပြင်လေဟာ တနာရီကို ၄၅ မိုင်အထိ တိုက်ခတ်နိုင်ပြီး မြန်မာ့ ကမ်းရိုးတန်း တလျှောက်နဲ့ ကမ်းလွန်ပင်လယ်ပြင်တို့မှာ လှိုင်းအမြင့် ၁၄ ပေမှ ၁၆ ပေခန့်အထိ ရှိနိုင်တယ်လို့ သိရပါတယ်။
မိုးသည်းထန်စွာ ရွာသွန်းခြင်းနဲ့အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တပြက်ရေကြီးခြင်းနဲ့ မြေပြိုခြင်း စတဲ့ သဘာဝဘေးအန္တရာယ်တွေလည်း ဖြစ်ပေါ်နိုင်တယ်လို့ သိရပါတယ်။
ဒါကြောင့် အဆိုပါဒေသတွေရှိ ကုန်းမြင့်ဒေသအနီး နေထိုင်ကြသူတွေအနေနဲ့ မြေပြိုမှုအန္တရာယ်၊ မြစ်ငယ်၊ ချောင်းငယ်တွေအနီး နေထိုင်ကြသူတွေအနေနဲ့ ရေကြီး၊ ရေလျှံမှုတွေကို ကြိုတင်သတိပြု ရှောင်ရှားကြဖို့ လိုအပ်တယ်လို့ သိရပါတယ်။
ဒါအပြင် ပြည်တွင်းရေကြောင်း သွားလာရေး၊ လေကြောင်းပျံသန်းရေးနဲ့ ဆည်မြောင်း တာတမံတွေ အနေနဲ့လည်း လိုအပ်တာတွေကို ကြိုတင်ပြင်ဆင် ဆောင်ရွက်ထားကြဖို့ မိုး/ဇလဌာနက သတိပေး နှိုးဆော်ထားပါတယ်။
Photo – CJ/MFSD
