ဇွန် ၊ ၁၂-၂၀၂၂
SP (VOM)
စစ်ကိုင်းတိုင်း ၊ ရွှေဘိုမြို့ ၊ အမှတ် ၃ ရပ်ကွက်၊ အိန္ဒာရပ်က အလှပြင်ဆိုင်ကို မနေ့ ဇွန် ၁၁ ရက် ည၁၁ နာရီ ဝန်းကျင်အချိန်က သေနတ်ပစ်ဖောက်ပြီး အလှပြင်ဆိုင်ရှင်နဲ့ ဆိုင်အကူ ၂ ယောက်ကို ဖမ်းဆီးခေါ်ဆောင်သွားတယ်လို့ အဲ့ဒီရပ်ကွက်နေထိုင်သူတွေဆီက သိရပါတယ်။
” ညက သေနတ်ပစ်ဖောက်သံတော့ကြားလိုက်ရတယ် ၊ ဒီမနက်ကျမှ သိရတာက အေးမွန်သူ အလှပြင်ဆိုင်မှာဖြစ်တာတဲ့ ၊ အဲ့ဒီဆိုင်က ဆိုင်ရှင်ရော ဆိုင်အကူလူတွေပါ ဖမ်းသွားတာ “လို့ အမှတ် ၃ ရပ်ကွက်နေ ဒေသခံတဦးက ပြောပါတယ်။
ဖမ်းဆီးခံရတဲ့ အေးမွန်သူ အလှပြင်ဆိုင်ရဲ့ ဆွေမျိုးသားချင်းတယောက် က ” ညက ဖမ်းသွားတာ ဒီကနေ့ ညနေပိုင်းအထိတော့ အဆက်အသွယ်မရဘူး ၊ ဘယ်မှာ ချုပ်နှောင် စစ်ဆေးနေတယ်ဆိုတာ မသိရတော့ စိတ်ပူတယ် “လို့ ပြောပါတယ်။
အဲ့ဒီ အကြောင်းနဲ့ပတ်သက်ပြီး ရွှေဘိုမြို့နယ် ရဲတပ်ဖွဲ့ရုံးနဲ့ နီးစပ်သူတဦးက ” အဲ့ဒီ အလှပြင်ဆိုင်နေရာက ရဲစခန်းနဲ့နီးတယ် ၊ စခန်း အဝင်အထွက် အခြေအနေတွေကို စောင့်ကြည့်ပြီး သတင်းဖြန့်နေတာကြောင့် ဖြစ်တယ် ” လို့ ပြောပါတယ်။
အဲ့ဒီအလှပြင်ဆိုင်ကို လာဖမ်းတဲ့အခါ တံခါးဖွင့်မပေးတာကြောင့် သေနတ်နဲ့ ပစ်ဖောက်တယ် ၊အိမ်ပြတင်းတံခါးက မှန်တွေကွဲသွားတယ် ၊ နောက်ပြီး အဲ့ဒီက မဆွေဆွေဦး ၊ မအေးအေးခိုင် အပါအဝင် ဆိုင်အကူ အမျိုးသမီး ဝန်ထမ်း ၂ ယောက်ပါ ဖမ်းခေါ်သွားတာလို့ ရွှေဘိုမြို့ဒေသခံတွေရဲ့ ပြောပြချက်အရ သိရပါတယ်။
#voiceofmyanmar #VOM #ရွှေဘို #အလှပြင်ဆိုင် #ဆိုင်ရှင်နဲ့ဆိုင်အကူ #ဖမ်းဆီးခံရ
