နိုဝင်ဘာ ၂၀
GG(VOM)
ရန်ကုန်တိုင်း၊ ခရမ်းမြို့နယ်ထဲက ရပ်ကွက်၊ကျေးရွာ ပါမကျန် အားလုံး လာမယ့်နိုဝင်ဘာ ၂၆ ရက်နေ့ကစပြီး ဆိုင်ကယ်စီးခွင့်ပိတ်မှာဖြစ်တယ်လို့ မြို့နယ်စီမံအုပ်ချုပ်ရေးအဖွဲ့က အသိပေးလိုက်ပါတယ်။
ရပ်ရွာတွေအထိပါ ဆိုင်ကယ်စီးခွင့်ပိတ်မယ့်အစီစဥ်က ကျေးရွာနေထိုင်သူတွေအတွက် အမှန်တကယ် အဆင်မပြေကြောင်း၊သွားလာရေး အလွန်ခက်ခဲတာတွေဖြစ်လာနိုင်တဲ့အပြင် ကျန်းမာရေးကိစ္စတွေအတွက်သွားလာရာမှာပါ အခက်ကြုံတာကြောင့် ဒုက္ခရောက်နိုင်တယ်လို့ ခရမ်းဒေသခံတချို့က ပြောပါတယ်။
” ရွာတွေမှာက ဆိုင်ကယ်အဓိကအသုံးပြုလုပ်ကိုင်နေရတာ၊တခုခုဆို ဒီဆိုင်ကယ်ပဲရှိတာ။စက်ဘီးနဲ့က အနီးအနားလောက်ပဲအဆငိပြေတာ၊ ပစ္စည်းဝိတ်များတာဆိုရင်လည်း ဆိုင်ကယ်ကမှ အဆင်ပြေတာ ။သူတို့ဘယ်လိုစိတ်ကူးနဲ့ဆိုင်ကယ်စီးခွင့်ပိတ်လဲ စဥ်းစားမရဘူး။ ရွာမှာက ဘေးတွဲဆိုင်ကယ်ကလည်း လိုချင်တဲ့အချိန် ငှားမရနိုင်ဘူး။တနေ့လုပ်မှ တနေ့စားရသူတွေဆို ငှားခအပိုမပေးနိုင်ဘူးလေ ၊ ပြီးခဲ့တဲ လကတည်းက ဆိုင်ကယ်စီးခွင့်ပိတ်တယ် စီးမရဘူးလို့ အသိပေးတာမျိုးလည်းရှိခဲ့ပေမယ့် အခုကတော့ စာထုတ်တာပေါ့။ရွာတွေအထိတော့ မပါလောက်ဘူးထင်တာ”လို့ ဒေသခံတဦးက ပြောပါတယ်။
အုပ်ချုပ်ရေးအဖွဲ့ ကတော့ အခုလို ဆိုင်ကယ်စီးခွင့်ပိတ်တာဟာ အရပ်သားပြည်သူတွေနဲ့ နိုင်ငံ့ဝန်ထမ်းတွေ ၊ ကျေးရွာအုပ်စုအုပ်ချုပ်ရေးမှူးတွေကို ဆိုင်ကယ်စီးပြီး သတ်ဖြတ်သူတွေရှိတာကြောင့် ခရမ်းမြို့နယ်ထဲ ရပ်ကွက်ကျေးရွာပါမကျန် ဆိုင်ကယ်စီးခွင့်တားမြစ်ဖို့ ဆုံးဖြတ်လိုက်တာဖြစ်တယ်လို့ အုပ်ချုပ်ရေးအဖွဲ့ အသိပေးစာမှာ ဖော်ပြထားပါတယ်။
ဒါ့ကြောင့် ဆိုင်ကယ်စီးနင်းခွင့်ပိတ်မယ့် နိုဝင်ဘာလ ၂၆ ရက်ကစပြီး စီးနင်းတာတွေမလုပ်ဖို့နဲ့ အကယ်၍ စီးနင်းနေတာကိုဖမ်းမိပါက ဖမ်းဆီးအရေးယူမှာဖြစ်တယ်လို့သိရပါတယ်။
ဆိုင်ကယ်စီးခွင့်ပိတ်လိုက်တာကြောင့် ခရမ်းမြို့နယ်ရပ်ကွက် ၊ ကျေးရွာအုပ်စုအတွင်း သွားရေးလာရေး အခက်ခဲမဖြစ်အောင် ဘေးတွဲ ဆိုင်ကယ်တွေ၊ ဘတ္ထရီစက်ဘီးနဲ့ ကျန်တဲ့ အနှေးယာဉ်တွေ၊ ကားတွေကိုတော့ သတ်မှတ်ယာဉ်စည်းကမ်း၊ လမ်းစည်းကမ်းအတိုင်း ပုံမှန်စီးနင်းသွားလာခွင့်ပြုသွားမှာဖြစ်တယ်လို့ သိရပါတယ်။
ခရမ်းမြို့နယ်ထဲမှာ ဆိုင်ကယ်အသုံးပြုပြီး သတ်ဖြတ်ခဲ့မှု (၂၅)ကြိမ်ရှိပြီး သေဆုံးသူက (၂၁)ဦး ရှိခဲ့ကာ အဲ့ဒီထဲမှာ အုပ်ချုပ်ရေးမှူးတွေလည်းပါတယ်လို့ သိရပါတယ်။
အရင်ကလည်း ရန်ကုန်တိုင်းထဲက သန်လျင်မြို့၊ တွံတေး၊ဒလမြို့နယ်တွေမှာလည်း ဆိုင်ကယ်စီးခွင့် ပိတ်ထားပါတယ်။
#voiceofmyanmar #VOM #ခရမ်းမြို့ #ဆိုင်ကယ်စီးခွင့်ပိတ်
