ဖေဖော်ဝါရီ ၁၆ – ၂၀၂၅
SS (VOM)
ရန်ကုန်တိုင်း၊ လှိုင်မြို့နယ်၊ (၁၂) ရပ်ကွက်ရှိ ဘာတာဈေး (လှိုင်ရတနာဈေး) မှာ ဒီကနေ့ ဖေဖော်ဝါရီ ၁၆ ရက်၊ မနက်အစောပိုင်းက မီးလောင်မှုဖြစ်ပွားခဲ့ပြီး ဆိုင်ခန်း ၁၂၀ ဝန်းကျင် ပျက်စီးဆုံးရှုံးခဲ့တယ်လို့ မြန်မာနိုင်ငံ မီးသတ်တပ်ဖွဲ့မှ သိရပါတယ်။
ဒီကနေ့မနက် ၁၂ နာရီ ၁၁ မိနစ်ဝန်းကျင်က မီးစတင် လောင်ကျွမ်းခဲ့ခြင်းဖြစ်ပြီး အဲဒီမီးလောင်မှုကို Level 2 ယာဉ်အုပ်စု ထွက်ခွာ မီးငြှိမ်းသတ်ခဲ့ရခြင်း ဖြစ်တယ်လို့ သိရပါတယ်။
“ဒီမီးလောင်မှုမှာ လူအထိအခိုက်တော့ မရှိခဲ့ဘူး။ ဆိုင်ခန်းကတော့အားလုံး စုစုပေါင်း ၁၂၀ ပါသွားတယ်။ မီးလောင်မှုကြောင့် ဆုံးရှုံးတန်ဖိုးနဲ့ အကြောင်းရင်းလည်း မရသေးဘူး။ သူက စုံခုံဖွဲ့ပြီး စစ်မှာဆိုတော့ အခြေအနေက မသိရသေးဘူး” လို့ မြန်မာနိုင်ငံ မီးသတ်တပ်ဖွဲ့မှ တာဝန်ရှိသူတယောက်က ပြောပါတယ်။
အချိန် တနာရီနီးပါး ကြာမြင့်ခဲ့တဲ့ အဲဒီ မီးလောင်မှုကို မနက် ၁၂ နာရီ ၁၄ မိနစ်အချိန်မှာ Level 1 ယာဉ်အုပ်စု ထွက်ခွာ ငြှိမ်းသတ်ခဲ့ရပြီး မနက် ၁၂ နာရီ ၁၆ မိနစ်အချိန်မှာတော့ Level 2 ယာဉ်အုပ်စု ထပ်မံ ထွက်ခွာ မီးငြှိမ်းသတ်ခဲ့ရခြင်း ဖြစ်တယ်လို့ သိရပါတယ်။
အဲဒီ မီးလောင်ကျွမ်းမှုကို မြန်မာနိုင်ငံ မီးသတ်တပ်ဖွဲ့နဲ့အတူ ပရဟိတ အသင်းအဖွဲ့တွေပါ သွားရောက်ကူညီ ငြှိမ်းသတ်ခဲ့ခြင်းဖြစ်ကာ မနက် ၁၂ နာရီ ၄၈ မိနစ်အချိန်မှာ မီးထိန်းနိုင်ခဲ့ပြီး မနက် ၁ နာရီဝန်းကျင်အချိန်မှာတော့ အပြီးသတ် မီးငြှိမ်းနိုင်ခဲ့တယ်လို့ သိရပါတယ်။
လက်ရှိ မြန်မာနိုင်တဝန်း ဈေးမီးလောင်မှုတွေ မကြာခဏဆိုသလို ဖြစ်ပွားလျက်ရှိတာမှာ ပြီးခဲ့တဲ့ ဖေဖော်ဝါရီ ၁၄ ရက်နေ့ကလည်း ရန်ကုန်မြို့၊ မြောက်ဥက္ကလာပမြို့နယ်၊ အောင်မင်္ဂလာအဝေးပြေးအနီး၊ သီရိရတနာလက်ကားဈေးမှာ လျှပ်စစ်ဝါယာရှော့ဖြစ်ပြီး မီးလောင်ကျွမ်းမှုကြောင့် ဆိုင်ခန်း သုံးခန်း ပျက်စီးခဲ့တယ်လို့ မြို့နယ်မီးသတ်က ပြောပါတယ်။
အလားတူ ဖေဖော်ဝါရီ ၆ ရက်နေ့ကလည်း ပဲခူးတိုင်း၊ ပဲခူးမြို့နယ်၊ ဘုရားကြီးမြို့မစျေးမှာ မီးလောင်မှု ဖြစ်ပွားခဲ့ပြီး ဆိုင်ခန်း ရှစ်ခန်း ဆုံးရှုံးခဲ့တယ်လို့ သိရပါတယ်။
အဲဒီလိုပဲ ဖေဖော်ဝါရီ ၁၂ ရက်နေ့ကလည်း စစ်ကိုင်းတိုင်း (အထက်ပိုင်း)၊ အင်းတော်မြို့ရဲ့ ၁ မိုင်ခန့်အကွာမှာရှိတဲ့ နဘားရွာစျေးမှာ မီးလောင်မှုဖြစ်ပွားခဲ့ပြီး စျေးရဲ့ သုံးပုံ နှစ်ပုံလောက် မီးထဲပါသွားတယ်လို့ အင်းတော်ဒေသခံတချို့ဆီက သိရပါတယ်။
ဆက်လက်ပြီး ဇန်နဝါရီလ ၁၈ ရက်နေ့ကလည်း ဧရာဝတီတိုင်း၊ မြောင်းမြမြို့၊ အမှတ် (၂) ရပ်ကွက်ရှိ ညောင်ပင်လေးဈေးမှာ မီးလောင်မှု ဖြစ်ပွားခဲ့ပြီး ဆိုင်ခန်းပေါင်း ၁၁၀ နီးပါး ပျက်စီးဆုံးရှုံးခဲ့တယ်လို့ သိရပါတယ်။
မြန်မာနိုင်ငံ မီးသတ်တပ်ဖွဲ့ ဌာနချုပ်ရဲ့ စာရင်းတွေအရ ပြီးခဲ့တဲ့ ၂၀၂၄ ခုနှစ်အတွင်း မြန်မာနိုင်ငံတဝန်း မီးလောင်မှု အကြိမ်ရေ စုစုပေါင်း ၁၁၅၀ ကြိမ် ဖြစ်ပွားခဲ့တယ်လို့ သိရပြီး မီးလောင်မှုကြောင့် သေဆုံးသူ ၉၉ ယောက်၊ ဒဏ်ရာရရှိသူ ၁၃၈ ယောက် ရှိခဲ့ကာ ဆုံးရှုံးမှုတန်ဖိုး ကျပ်သန်းပေါင်း ၉၀၀၀ ကျော် ရှိခဲ့တယ်လို့ သိရပါတယ်။
Photo – MFSD
