ဩဂုတ် ၁၂ ၊ ၂၀၂၆
GG (VOM)
ရန်ကုန်က မြို့နယ်အချို့မှာ ဝမ်းပျက်ဝမ်းလျှောရောဂါဖြစ်နေပြီး ရန်ကုန်ဆေးရုံကြီး အပါအဝင် ဆေးရုံတချို့မှာ ဝမ်းပျက်ဝမ်းလျှောနဲ့ ဆေးရုံတက်ကုသနေရသူအများအပြားရှိနေတယ်လို့ သိရပါတယ်။
လက်ရှိ ရန်ကုန်ဆေးရုံကြီးမှာဆိုရင် ဝမ်းပျက်ဝမ်းလျှောဖြစ်လို့ ဆေးကုသနေရသူတွေများနေတာကြောင့် လူနာ ဧည့်သည့်လက်ခံမှု ရပ်ထားတယ်လို့ သိရပါတယ်။
” ဟုတ်ပါတယ် ။ ဆေးရုံကြီးမှာ ဝမ်းပျက် လူနာအပြည့်ဘဲ ။ ဝန်ထမ်းတွေ အခန်းတွေရှင်းတာမနိုင်တေ့ာဘူး။ ဝမ်းပျက်ဝမ်းလျှောလူနာများလို့ လူနာ ဧည့်တွေလည်း လက်မခံဘူးသိရတယ်။” လို့ လူနာရှင်တယောက်က ပြောပါတယ်။
ဒါအပြင် ဆေးရုံကလူနာတွေကို ပြင်ပအလှူရှင်တွေက အာဟာရကျွေးမွေးလှူဒါန်းတဲ့ အစီအစဥ်ကိုလည်း လက်ရှိမှာ ဆေးရုံက ယာယီ ပိတ်ထားတယ်လို့ သိရပါတယ်။
“ကျွန်တော်က ၂၀ ရက်နေ့အာဟာရအလှူလုပ်ဖို့ booking လုပ်ထားတာပါ။ ရက်ချိန်းပြန်ယူရတော့မယ်ထင်တယ်။ ယာယီပိတ်ထားတယ်လို့ ဆေးရုံက ပြောပါတယ်။ ” လို့ ဆေးရုံကြီးက လူနာတွေကို အာဟာရကျွေးမွေးဖို့စီစဥ်ထားသူ တယောက်က ပြောပါတယ်။
ရန်ကုန်ဆေးရုံကြီး အပြင် ဗဟိုရ်စည်ဆေးရုံ ၊ ရွှေလမင်းဆေးရုံ ၊ အောင်ရတနာဆေးရုံ စတဲ့ ပုဂ္ဂလိက ဆေးရုံတချို့မှာလည်း ဝမ်းပျက်ဝမ်းလျှော ဖြစ်လို့ ဆေးကုသနေရသူတွေ များနေတယ်လို့ သိရပါတယ်။
” ကျမက အစားမှားသွားတာပါ။ ဒီနေ့နဲ့ဆို ဆေးရုံတက်တာ သုံးရက်ရှိပြီ။ သက်သာလာပါပြီ။ ဒီနေ့ဆင်းရဖို့များပါတယ်။ လက္ခဏာတွေက ဆက်တိုက်အန်ပြီး ဝမ်းဆက်တိုက် အရည်တွေသွားတာပါ။ကျွန်မကအခန်းထဲမှာဆိုတော့ သေချာ မသိပေမယ့် အပြင်မှာ ( ဝမ်းပျက်ဝမ်းလျှော) ဖြစ်နေတယ် ကြားပါတယ်။ ” လို့ ဝမ်းပျက်ဝမ်းလျှောနဲ့ အောင်ရတနာဆေးရုံမှာ တက်ရောက်နေသူ တယောက်က ပြောပါတယ်။
မနေ့က ဩဂုတ် ၁၁ ရက်နေ့က လမ်းမတော် ၊ လသာမြို့နယ်တွေကတင် ဝမ်းပျက်ဝမ်းလျှောရောဂါဖြစ်လို့ ဆေးရုံတက်ကုသမှုခံယူရသူ ၄၀ နီးပါးရှိခဲ့တယ်လို့ သိရပါတယ်။
အလားတူ စမ်းချောင်းမြို့နယ် ၊ သာကေတမြို့နယ် တွေအပြင် ကျန်တဲ့မြို့နယ်တချို့မှာပါ ဝမ်းပျက်ဝမ်းလျှောဖြစ်ပွားသူတွေ ရှိနေတယ်လို့ သိရပါတယ်။
ပြင်းထန်ဝမ်းပျက်ဝမ်းလျှော ရောဂါဟာ ဝမ်းရောဂါဖြစ်ပွားစေတဲ့ ရောဂါပိုးပါရှိတဲ့ မသန့်ရှင်းသောရေနဲ့ အစားအစာတွေကို စားသောက်မိရာမှတဆင့်ကူးစက်ဖြစ်ပွားခြင်းဖြစ်တယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
ရာသီမရွေးဖြစ်ပွားလေ့ရှိပြီး အထူးသဖြင့် မိုးဦးကျကာလနဲ့ မိုးအကုန်ဆောင်းအကူးမှာ အဖြစ်များကြောင်း ရောဂါလက္ခဏာတွေက အရည်ဝမ်းများစွာသွားခြင်း၊ ငါးညှီနံ့နံတဲ့ ဆန်ဆေးရည်ကဲ့သို့ ဝမ်းသွားခြင်း၊ အော့အန်ခြင်း၊နှလုံးခုန်နှုန်းမြန်ခြင်း၊ အရေပြားရဲ့ကျုံ့ဆန့်နိုင်အား လျော့နည်းလာခြင်း၊ မျက်တွင်းချိုင့်ဝင်ခြင်း၊ ခံတွင်း/လျှာနှင့်နှုတ်ခမ်းများခြောက်သွေ့ခြင်း၊ ကြွက်တက်ခြင်း၊ သတိလစ်ခြင်းတို့ဖြစ်တယ်လို့ ဆိုပါတယ်။
ဒါကြောင့် ဝမ်းပျက်ဝမ်းလျှော ရောဂါမဖြစ်ပွားအောင် ကြိုတင်ကာကွယ်တဲ့အနေနဲ့အစာမစားမီ နဲ့ အစားအစာမပြင်ဆင်မီအချိန် ၊ အညစ်အကြေးနဲ့ အမှိုက် ကိုင်တွယ်ပြီးချိန်၊ အိမ်သာမှဆင်းချိန်တိုင်း.လက်ကိုဆပ်ပြာနဲ့ စင်ကြယ်စွာ စနစ်တကျ ဆေးကြောဖို့ လိုအပ်ပါတယ်။
တကိုယ်ရေသန့်ရှင်းဖို့နဲ့ ၊ ရေကိုကျိုချက်သောက်သုံးခြင်း ၊ အစားအစာကို ကျက်အောင်ချက်ပြီးမှစားသုံးခြင်း ၊ အစားအစာကို ယင်မနားအောင် လုံခြုံစွာ ဖုံးအုပ်ထားခြင်း ၊ခြင် နဲ့ယင် မပေါက်ပွားစေရန် ပတ်ဝန်းကျင် သန့်ရှင်းရေးကို အထူးဂရုပြုဆောင်ရွက်ဖို့လိုသလို ယင်လုံအိမ်သာ ရာနှုန်းပြည့်သုံးစွဲဖို့ လိုအပ်ပါတယ်။
ပြင်းထန်ဝမ်းပျက်ဝမ်းလျှောရောဂါ ဖြစ်ပွားကြောင်း သံသယရှိပါက အချိန်မီကုသမှုခံယူရန် နီးစပ်ရာကျန်းမာရေးဌာန နဲ့ ပြည်သူ့ဆေးရုံတွေကို သွားရောက်ပြသဖို့ ဝန်ကြီးဌာနက သတိပေးထားပါတယ်။
ဓာတ်ပုံ – YGH
