Month: October 2020

အောက်တိုဘာ ၂၈-၂၀၂၀ အေးချမ်းသူ(VOM) ရှမ်းပြည်နယ်တောင်ပိုင်း ၊လင်းခေးခရိုင်၊ မိုင်းပြန်မြို့နယ်အတွက် မဲရုံပစ္စည်းတွေလာရောက်ပို့ဆောင်တဲ့ လင်းခေးခရိုင်အုပ်ချုပ်ရေးမှူးနဲ့အဖွဲ့ကို RCSS/SSAအဖွဲ့က သေနတ်နဲ့ပစ်ခတ်မှုကြောင့် အုပ်ချုပ်ရေးမှူးနဲ့ ဌာနခွဲစာရေးတို့ သေနတ်ဒဏ်ရာတွေရရှိခဲ့တယ်လို့ ရှမ်းပြည်နယ်ရွေးကောက်ပွဲကော်မရှင်ဥက္ကဋ္ဌ ဦးထင်ကျော်က VOMကိုပြောပါတယ်။ “ဖြစ်တာက နေ့လည် ၁နာရီခွဲလောက်မှာဖြစ်တာဗျ။ နာလောကျေးရွာအုပ်စု၊ ဟွေရှယ်ရွာသစ် အနီးတစ်ဝိုက်မှာ RCSS/SSAအဖွဲ့က ခရိုင်အုပ်ချုပ်ရေးမှူးပါလာတဲ့ကားကို လက်နက်ငယ်နဲ့ အနီးကပ်ပစ်ခတ်ခဲ့တာပါ”လို့ ဦးထင်ကျော်က ပြောပါတယ်။ လင်းခေးခရိုင်အုပ်ချုပ်ရေးမှူး ဦးနိုးဝေ နဲ့ ဌာနခွဲစာရေး ဦးနေမင်းအောင်တို့ဟာ မနေ့ အောက်တိုဘာ ၂၇ရက်နေ့ မနက်ပိုင်းက မိုင်းပန်မြို့နယ်အတွက် မဲရုံပစ္စည်းတွေကို လာရောက်ပို့ဆောင်ပြီး အပြန် မြို့ပြင်ဘက်မှာ ပစ်ခတ်ခံရတာဖြစ်တယ်လို့ ရှမ်း ပြည်နယ်ရွေးကောက်ပွဲကော်မရှင်ဥက္ကဋ္ဌ ဦးထင်ကျော်က VOMကိုရှင်းပြပါတယ်။ အခုလို လက်နက်ငယ်ပစ်ခတ်ခံရမှုကြောင့် လင်းခေးခရိုင်အုပ်ချုပ်ရေးမှူးရဲ့ ဘယ်ဘက်ပေါင်ထိမှန်ဒဏ်ရရှိခဲ့ပြီး ဌာနခွဲစာရေး ဦးနေမင်းအောင်ကလည်း ဘယ်ဒူး ကျည်ထိမှန်ခဲ့ကာ မိုင်းပန်ဆေးရုံက တဆင့် တောင်ကြီးစပ်စံထွန်းဆေးရုံကို ပို့ဆောင်ထားရတယ်လို့ ဦးထင်ကျော်ကပြောပါတယ်။…

အောက်တိုဘာ ၂၇-၂၀၂၀ အေးချမ်းသူ(VOM) NLD အောင်နိူင်ရေးအတွက် အင်အားပြလှည့်လည်ခဲ့တဲ့ ရွှေလီက မြန်မာအလုပ်သမားတွေကို အလုပ်ရှင်တွေက မဲပေးခွင့်မပြုတဲ့အတွက် မဲပေးခွင့်ဆုံးရှုံးနေရတယ်လို့ ရှမ်းပြည်နယ်အစိုးရအဖွဲ့ကနေ သိရပါတယ်။ ရွှေလီရောက်မြန်မာတွေ မဲပေးခွင့်ရရှိရေး ချိတ်ဆက်စီစဉ်ခဲ့ပေမယ့်လည်း အဆင်မပြေခဲ့ဘူးလို့ ရှမ်းပြည်နယ်အစိုးရအဖွဲ့ စီမံကိန်းနှင့်ဘဏ္ဍာရေးဝန်ကြီး ဦးစိုးညွန့်လွင်က VOMကို ပြောပါတယ်။ “သူတို့က တရုတ်အစိုးရရယ် အလုပ်ရှင်ရယ် မြန်မာရွှေပြောင်းအလုပ်သမားရယ် ကိုဗစ်ကာလမှာ သဘောတူစာချုပ်ကိုလက်မှတ်ရေးထိုးတာရှိတယ်၊ long time ရှိတယ်၊ ဒီကိုလာပြီး ဟိုဘက်ပြန်သွားလို့မရဘူး”လို့ ဝန်ကြီးဦးစိုးညွန့်လွင်ကရှင်းပြပါတယ်။ အခုလိုဖြစ်တဲ့ကိစ္စနဲ့ပတ်သက်ပြီး တာချီလိတ်မြို့နယ်မြန်မာရွှေပြောင်းအလုပ်သမားအရင်းအမြစ်စင်တာမှ တာန်ရှိသူတစ်ဦးကို ဆက်သွယ်မေးမြန်းရာမှာတော့” တရုတ်ပြည်နယ်က မြန်မာရွှေပြောင်းအလုပ်သမားတွေ မဲပေးခွင့်နဲ့ပတ်သက်ပြီး သိရှိခြင်းမရှိဘူး၊ လက်ရှိအခြေအနေမှာ ခြောက်လခန့်နေသူများသာ မဲပေးခွင့်ရရှိပြီး ကျန်တဲ့အကြောင်းအရာတွေကို ရွေးကောက်ပွဲကော်မရှင်ကိုမေးမြန်းမှသာ သိရှိမှာဖြစ်တယ်”လို့ ပြောပါတယ်။ မြန်မာရွှေ့ပြောင်းလုပ်သား ၉၀၀ ခန့်ဟာ ရွေးကောက်ပွဲမှာ မဲပေးခွင့်ရရှိဖို့ကြိုးပမ်းတဲ့အနေနဲ့ တရုတ်နိုင်ငံ၊ ရွှေလီမြို့မှာ အောက်တိုဘာ ၈ ရက်နေ့က အင်အားပြလှည့်လည်ခဲ့တာဖြစ်ပါတယ်။…

အောက်တိုဘာ ၂၇-၂၀၂၀ ကိုအောင်(VOM) ဧရာဝတီတိုင်း၊ မအူပင်မြို့အကျဉ်းထောင်မှာ ဒီကနေ့စစ်ဆေးချက်အရ အကျဉ်းသားနဲ့ဝန်ထမ်း(၁၀၄)ဦးမှာ ကိုဗစ်ရောဂါတွေ့ရှိခဲ့တယ်လို့ တိုင်းကျန်းမာရေးဦးစီးဌာနကနေ သိရပါတယ်။ မနေ့ အောက်တိုဘာ ၂၆ရက်နေ့က ရောဂါတွေ့ရှိသူအကျဉ်းသားရဲ့အဆောင်အတူနေသူတွေနဲ့ ထောင်ဝန်ထမ်းတွေအပါအဝင် လူဦးရေ(၁၅၀)ကို စစ်ဆေးခဲ့ရာမှာတော့(၆၉)ဦးမှာ ရောဂါတွေ့ရှိခဲ့ပြီး ဒီနေ့စစ်ဆေးမှုမှာတော့ (၃၅)ဦးထပ်မံတွေ့ရှိခဲ့တာဖြစ်ပါတယ်။ “မအူပင်ထောင်အဆောင်(၆)က အကျဉ်းသား(၉၆)ဦးကိုစစ်ဆေးရာမှာ (၃၁)ဦးမှာရောဂါတွေ့ခဲ့ရပြီး၊ ထောင်ဝန်ထမ်း(၁၀)ဦးထဲက (၄)ဦးမှာရောဂါတွေ့ခဲ့ရတယ်၊ ထောင်အတွင်း ကိုဗစ်ထပ်မံကူးစက်မှုကို တားဆီးဖို့အတွက် မအူပင်မြို့နယ် ကျန်းမာရေးဌာနက ရောဂါတွေ့သူတွေနဲ့ထိတွေ့ခဲ့တဲ့ အကျဉ်းသားတွေ၊ ထောင်ဝန်ထမ်း၊ ထောင်ကအပြင်ထွက်ရမယ့်သူတွေကို ရောဂါရှိမရှိ ထပ်မံစစ်ဆေးသွားမယ်”လို့ ဧရာဝတီတိုင်းကျန်းမာရေးဦးစီးဌာန တိုင်းဦးစီးမှုး ဒေါက်တာသန်းထွန်းအောင်ကပြောပါတယ်။ ဒီကနေ့အောက်တိုဘာ ၂၇ရက် မနက်ပိုင်းထုတ်ပြန်ချက်အရ ဧရာဝတီတိုင်းအတွင်းမှာ ကိုဗစ်အတည်ပြုလူနာ (၉၄၉)ဦးထိရှိလာပြီး မအူပင်မြို့နယ်မှာ ဒီကနေအ့ထိ (၃၀၇)ဦးထိရှိလာနေပြီဖြစ်ပါတယ်။ ပြီးခဲ့တဲ့ အောက်တိုဘာ(၂၃)ရက်နေ့က အသက်ရူကြပ်နေတဲ့အကျဉ်းသားတစ်ဦးကို မအူပင်ဆေးရုံကို ခေါ်ယူစစ်ဆေးရာကနေ အောက်တိုဘာ(၂၅)ရက်နေ့မှာ ကိုဗစ်ရောဂါတွေ့ရှိခဲ့တာဖြစ်တယ်လို့ သိရပါတယ်။ #voiceofmyanmar #VOM #မအူပင် #အကျဉ်းထောင်…