ဩဂုတ် ၂၅ – ၂၀၂၅
SN (VOM)
မိုးထပ်မံ ရွာသွန်းပါက နေပြည်တော်ရှိ နေရာတချို့မှာ ရေကြီးမှုအခြေအနေ ပိုမို ဆိုးရွားလာနိုင်တဲ့အတွက် သက်ဆိုင်ရာ တာဝန်ရှိသူတွေနဲ့ ကယ်ဆယ်ရေး အဖွဲ့တွေ အသင့် အနေအထားနဲ့ စောင့်ကြည့်နေကြပြီး မိုးလေဝသနှင့် ဇလဗေဒ ညွှန်ကြားမှုဦးစီးဌာနရဲ့ ထုတ်ပြန်ချက်အရ လာမယ့်ရက်တွေမှာ တိုင်ဖွန်းမုန်တိုင်း “ကဂျိကိ” ရဲ့ အရှိန်ကြောင့် နေပြည်တော် အပါအဝင် တိုင်းနဲ့ ပြည်နယ်တချို့ မိုးဆက်ကြီးနိုင်တယ်လို့ သိရပါတယ်။
မနေ့ ဩဂုတ် ၂၄ ရက်၊ ညပိုင်းက သည်းထန်စွာ ရွာသွန်းခဲ့တဲ့ မိုးကြောင့် ဒီကနေ့ ဩဂုတ် ၂၅ ရက်၊ မနက်ပိုင်းမှာ ဇေယျာသီရိမြို့နယ်ထဲက နေရာတချို့နဲ့ ပင်လောင်းလမ်းဆုံ၊ ရန်ကုန် – မန္တလေး လမ်းဟောင်းဘက်မှာ ကားလမ်းရေကျော်မှုတွေ ဖြစ်ပွားခဲ့တယ်လို့ သိရပါတယ်။
လက်ရှိ အချိန်မှာတော့ အဆိုပါ နေရာတွေမှာ ရေအနည်းငယ်သာ ကျန်ရှိတော့ပေမယ့် မိုးထပ်မံ ရွာသွန်းပါက ရေထပ်တက်နိုင်ခြေ ရှိနေတဲ့အတွက် အခြေအနေကို စောင့်ကြည့်နေတယ်လို့ သိရပါတယ်။
“အခုက အချိန်အထိတော့ မိုးမရွာသေးဘူး။ မိုးထပ်မရွာဘူး ဆိုရင်တော့ လက်ရှိ တက်ပြီးသားရေပဲ ထပ်ပြီး စီးဆင်းမှာပဲ ရှိမှာ။ မစိုးရိမ်ရဘူးပေါ့။ ဒါပေမယ့် နောက်ထပ် မိုးထပ်ရွာခဲ့မယ်ဆိုရင်တော့ ရေပိုကြီးလာနိုင်တယ်။ ကျွန်တော်တို့တွေ ဒီည မအိပ်ဘဲနဲ့တောင်မှ စောင့်ကြည့်ဖို့ အစီအစဉ်တွေ ဆွဲနေပြီ” လို့ နေပြည်တော်အခြေစိုက် လူမှုကူညီရေးအသင်း တာဝန်ရှိသူ ပြောပါတယ်။
ဒါအပြင် လှေတွေကိုလည်း မြို့၊ ရွာအလိုက် အဆင်သင့်ဖြစ်အောင် စနစ်တကျ ပြင်ဆင်နေပြီး ညပိုင်း အချိန်တွေမှာ ကင်းပတ်တဲ့သဘောနဲ့ ရေအခြေအနေတွေကို စောင့်ကြည့်သွားမှာဖြစ်ကာ ကိုယ်နဲ့ အလှမ်းဝေးတဲ့ ဒေသတွေနဲ့ ပတ်သက်လို့လည်း ဆက်သွယ်ရေး အဆင်ပြေအောင် စီစဉ် ဆောင်ရွက်နေတယ်လို့ သူက ပြောပါတယ်။
လက်ရှိ ရေအခြေအနေအရ ဆင်သေချောင်းဘက်က မစိုးရိမ်ရသေးပေမယ့် တောင်ပေါ်ဘက်မှာ မိုးများလာမယ် ဆိုရင်တော့ နဝင်းချောင်းကတော့ စိုးရိမ်စရာအခြေအနေမှာ ရှိနေတယ်လို့ ဆိုပါတယ်။
ဒါအပြင် လက်ရှိမှာလည်း ဇေယျာသီရိမြို့နယ်က အိုင်စောက်ကျေးရွာအနီးမှာ ရေပြန်ကျော်နေပြီး အဆိုပါ ကျေးရွာအတွင်း ရေဝင်ရောက်နေပြီ ဖြစ်တယ်လို့ သိရပါတယ်။
“မနက်က ဇေယျာသီရိမြို့နယ်ဘက်နဲ့ ပင်လောင်းလမ်းဆုံဘက်မှာ တက်ခဲ့တဲ့ရေတွေက အခု ညနေပိုင်းမှာ အိုင်စောက်ရွာဘက်ကို စီးဝင်နေတာ။ စည်ပင်ကြီးကျေးရွာနဲ့ ချောင်းကမ်းကြီး ကျေးရွာတွေအနီးက ရွာတွေလည်း သတိလေးနဲ့တော့ နေပေးစေချင်တယ်။ ရေရောက်သည်ဖြစ်စေ၊ မရောက်သည်ဖြစ်စေ အရမ်းတော့ မစိုးရိမ်ပါနဲ့” လို့ သူက ပြောပါတယ်။
ဒီကနေ့ မနက်ပိုင်းက ဇေယျာသီရိမြို့နယ်နဲ့ ပင်လောင်းလမ်းဆုံမှာ ကားလမ်းရေကျော်မှု ဖြစ်ပွားခဲ့တာမှာ ရေစီးသန်ခဲ့တာကြောင့် ကားကြီးတွေသာ သွားလာလို့ရပြီး ကားအသေးတွေနဲ့ ဆိုင်ကယ်တွေ ဖြတ်သန်း သွားလာလို့မရ ဖြစ်ခဲ့တယ်လို့ သိရပါတယ်။
“မနက်က ကားလမ်း ရေကျော်မှုမှာ ကားကြီးတစီးက မြေသားပျော့တဲ့ နေရာကို ဘီးကျွံဝင်သွားလို့ ကရိန်းနဲ့ ဆွဲလိုက်ရတာမျိုး ရှိတယ်။ ဆိုင်ကယ် လေး၊ ငါးစီးလောက်လည်း ရေစီးနောက်ပါပြီး လဲတာမျိုး ရှိတယ်။ လမ်းပိတ်ဆို့မှု အနည်းငယ်တော့ ဖြစ်ခဲ့တာပေါ့” လို့ သူက ပြောပါတယ်။
လက်ရှိ ရေကြီးမှု အခြေအနေနဲ့ ပတ်သက်လို့ ပြည်သူတွေအနေနဲ့ အခု ရက်ပိုင်းတွေမှာ မိုးလေဝသ သတင်းတွေကို တတ်နိုင်သမျှ စောင့်ကြည့်၊ နားစွင့်ထားစေလိုပြီး အရေးကြီး ပစ္စည်းတွေနဲ့ အလွယ်တကူ သယ်ယူလို့ရမယ့် ပစ္စည်းတွေကို သိမ်းဆည်းကာ ကြိုတင် ပြင်ဆင်ထားစေချင်တယ်လို့ သူက ပြောပါတယ်။
လက်ရှိ မိုးလေဝသ ဖြစ်စဉ်တွေနဲ့ ပတ်သက်လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနရဲ့ ဒီကနေ့ ဩဂုတ် ၂၅ ရက်၊ နေ့လယ် ၂ နာရီအချိန် ထုတ်ပြန်ချက်အရ တောင်တရုတ် ပင်လယ်ပြင်မှာ ဖြစ်ပေါ်နေတဲ့ တိုင်ဖွန်းမုန်တိုင်း “ကဂျိကိ” (KAJIKI) ဟာ အနောက်ဘက်ကို ရွေ့လျားခဲ့ပြီး တုံကင်ပင်လယ်ပြင်ကို ရောက်ရှိခဲ့ပြီ ဖြစ်တယ်လို့ သိရပါတယ်။
အဆိုပါ တိုင်ဖွန်းမုန်တိုင်းဟာ ဗီယက်နမ်နိုင်ငံ၊ ဗင့်မြို့ (Vinh) ရဲ့ အရှေ့ – အရှေ့တောင်ဘက် ရေမိုင် ၃၀ မိုင်ခန့်၊ ဒါနန်းမြို့ (Da Nang) ရဲ့ မြောက် – အနောက်မြောက်ဘက် ရေမိုင် ၁၉၀ မိုင်ခန့်အကွာ ပင်လယ်ပြင်ကို ဗဟိုပြုနေတယ်လို့ သိရပါတယ်။
ခန့်မှန်းချက်အရ အဆိုပါ တိုင်ဖွန်းမုန်တိုင်းဟာ အနောက် – အနောက်မြောက်ဘက်ကို ရွေ့လျားနိုင်ပြီး နောက် ၆ နာရီအတွင်း ဗီယက်နမ်နိုင်ငံ ကမ်းခြေကို ဗင့်မြို့အနီးမှ ဖြတ်ကျော်နိုင်ကာ ထိုမှတဆင့် နောက် ၂၄ နာရီအတွင်း ဗီယက်နမ်နိုင်ငံနဲ့ လာအို နိုင်ငံ အထက်ပိုင်းဒေသတွေကို ဆက်လက် ဖြတ်ကျော်နိုင်ပြီး အပူပိုင်းမုန်တိုင်းအဖြစ်ကို အားလျော့သွားနိုင်တယ်လို့ သိရပါတယ်။
အဆိုပါ တိုင်ဖွန်းမုန်တိုင်း “ကဂျိကိ” ရဲ့ အရှိန်ကြောင့် ဒီကနေ့ ဩဂုတ် ၂၅ ရက်၊ နေ့လယ်ပိုင်းမှ လာမယ့် ဩဂုတ် ၂၉ ရက်နေ့အတွင်း နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူး တိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊
မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ်တို့မှာ နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး တချို့ဒေသတွေမှာ ဒေသအလိုက်နဲ့ နေရာကွက်ပြီး မိုးကြီးနိုင်တယ်လို့ သိရပါတယ်။
ဒါအပြင် မြန်မာ့ကမ်းရိုးတန်း တလျှောက်နဲ့ ကမ်းလွန်ပင်လယ်ပြင်တို့မှာ ရံဖန်ရံခါ မိုးသက်လေပြင်းတွေ ကျရောက်ပြီး လှိုင်းကြီးနိုင်ကာ မိုးသက်လေပြင်းကျစဉ် ရေပြင်/မြေပြင်လေဟာ တနာရီကို ၃၅ မိုင်အထိ တိုက်ခတ်နိုင်သလို မြန်မာ့ကမ်းရိုးတန်း တလျှောက်နဲ့ ကမ်းလွန် ပင်လယ်ပြင်တို့မှာလည်း လှိုင်းအမြင့် ၁၀ ပေမှ ၁၂ ပေခန့်အထိ ရှိနိုင်တယ်လို့ သိရပါတယ်။
အဆိုပါ တိုင်ဖွန်းမုန်တိုင်းရဲ့ အရှိန်ကြောင့် မိုးသည်းထန်စွာ ရွာသွန်းခြင်းနဲ့အတူ လေပြင်းတိုက်ခတ်ခြင်း၊ ရုတ်တရက် ရေကြီးခြင်းနဲ့ မြေပြိုခြင်း စတဲ့ သဘာဝ ဘေးအန္တရာယ်တွေလည်း ဖြစ်ပေါ်နိုင်တဲ့အတွက် ကုန်းမြင့်ဒေသအနီး နေထိုင်ကြသူတွေ အနေနဲ့ မြေပြိုမှုအန္တရာယ်၊ မြစ်ငယ်၊ ချောင်းငယ်တွေအနီး နေထိုင်ကြသူတွေအနေနဲ့ ရေကြီး၊ ရေလျှံမှုတွေကို ကြိုတင်သတိပြုကြဖို့ လိုအပ်တယ်လို့ သိရပါတယ်။
ဒါအပြင် ပြည်တွင်းလေကြောင်း ပျံသန်းရေး၊ မြန်မာ့ကမ်းရိုးတန်း တလျှောက်နဲ့ ကမ်းလွန် ပင်လယ်ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်တွေ၊ သင်္ဘောတွေအနေနဲ့လည်း ကြိုတင် သတိပြုကြဖို့ လိုအပ်တယ်လို့ မိုး/ဇလဌာနက အသိပေး နှိုးဆော်ထားပါတယ်။
ဓာတ်ပုံ – ကရုဏာရှင် လူမှုကူညီရေးအသင်း /CJ
