ဩဂုတ် ၂၇ ၊ ၂၀၂၅
GG (VOM)
ရှမ်ပြည်နယ်တောင်ပိုင်း ၊ပေါင်းလောင်းမြို့သစ်၊သပြေကုန်းအုပ်စု၊ ဧဒင်ကျေးရွာမှာ မိုးများပြီး ရေကြီးကာ တောင်ကျရေတွေကြောင့် တောင်ပြိုမြေပြိုပြီး လူနှစ်ယောက်သေဆုံးမှုရှိခဲ့တယ်လို့သိရပါတယ်။
ဩဂုတ် ၂၆ ရက်နေ့ ညပိုင်းမှာ မိုးသည်းထန်စွာရွာသွန်းပြီး နေအိမ်တွေပေါ်ကို မြေပြိုတောင်ပြိုခဲ့တာကြောင့် နေအိမ်မှာအိပ်နေတဲ့ အမျိုးသား တယောက်နဲ့ အမျိုးသမီး တယောက်သေဆုံးခဲ့ရတာဖြစ်တယ်လို့သိရပါတယ်။
” ညကြီး အိပ်နေချိန်တောင်ပြိုတော်အိမ်ရောလူပါပါသွားတာ။ အမျိုးသားတယောက်ကတော့ပြန်တွေ့ပြီ။အမျိုးသမီးကတော့ ခုထိပြန်မတွေ့သေးဘူး။အခုထိလည်းမြေပြိုတောင်ပြိုနေတုန်းပဲ။လမ်းတွေလည်းပြိုကျနေတယ်။ အိမ်ကတော့ ၁၀ လုံးပျက်စီးတယ်။ကျန်တဲ့ရွာတွေကတော့ ဖုန်းလိုင်းမရတော့ အဆက်အသွယ်ပြတ်နေတော့ အခြေအနေမသိရသေးဘူး။ဒီရွာကတွေက တပ်ကုန်းနဲ့ မိုင်၂၀လောက်ပဲဝေးတယ်။” လို့ မြေပြင်ကူညီရေးသွားရောက်ဖို့ပြင်ဆင်နေတဲ့ ကိုသိန်းသန်းအောင်ကပြောပါတယ်။
လက်ရှိအချိန်ထိ အဆိုပါနေရာဘက်မှာ တောင်ကျရေကြောင့် တောင်ပြိုမှု မြေပြိုမှုတွေဖြစ်ပွားနေဆဲ ဖြစ်တဲ့အတွက် ကူညီကယ်ဆယ်ရေးတွေ သွားရောက်နိုင်ခြင်းမရှိသေးကြောင်း ၊ ဒေသခံရွာသားအချင်းချင်း စုပေါင်းပြီးသာ ကူညီကယ်ဆယ်ရေးလုပ်ကိုင်နေကြရတယ်လို့သိရပါတယ်။
အလားတူ မိုးသည်းထန်စွာရွာသွန်းမှုကြောင့် မြစ်ရေတက်ပြီး နေပြည်တော် တပ်ကုန်းနဲ့ ဇေယျာသီရိမြို့နယ်ထဲက ကျေးရွာအချို့မှာလည်း ရေကြီးရေလျှံ မှုဖြစ်ပွားနေသလို ပင်လောင်းလမ်းဆုံမှာလည်း ကားလမ်းရေကျော်နေပြီဖြစ်တယ်လို့သိရပါတယ်။
မနေ့က အင်းလေးဒေသမှာ မိုးရွာပြီး လေပြင်းတိုက်ခတ်လို့ ဟတ်ပုံးရွာနဲ့ ကံခေါင်းရွာမှာ လူနေအိမ် ၁၂၀ လောက် ထိခိုက်ပျက်စီးမှုဖြစ်ပွားခဲ့တယ်လို့သိရပါတယ်။
ဩဂုတ် ၆ ရက်နေ့ကလည်း ရှမ်းပြည်နယ်၊ကျောက်မဲမြို့နယ်ထဲက နောင်ပိန်ရွာမှာမိုးများပြီး လုပ်ပါကန်ကျိုးပေါက်လို့ ရေကြီးနစ်မြုပ်မှုဖြစ်ပွားကာ လူ သေဆုံးသူရှိခဲ့ပါတယ်။
အလားတူ ဩဂုတ် ၂ ရက်နေ့ကလည်း ပင်လောင်းမြို့နယ်ထဲက တောင်ပေါ်ရွာတွေဖြစ်တဲ့ ထီဝါးလီရွာ နဲ့ လွယ်မောင်းရွာမှာ မိုးများပြီး တောင်ကျရေကျလို့ နေအိမ်နဲ့စာသင်ကျောင်းပေါ်ကို မြေပြိုကျမှုဖြစ်ပွားကာ လူနေအိမ်နဲ့ စာင်ကျောင်းတွေထိခိုက်ပျက်စီးမှုရှိခဲ့ပါတယ်။
ဓာတ်ပုံ – ကိုသိန်းသန်းအောင်
