လွိုင်ကော်မှာ ပုံမှန်အတိုင်းပြန်စည်ကားနေပေမယ့် တိုက်ပွဲဖြစ်နိုင်ခြေကြောင့် ဒေသခံတွေ သတိအနေအထား ပြင်ဆင်ထားရ

ZY(VOM)
အောက်တိုဘာ ၂၆၊ ၂၀၂၄

ကယားပြည်နယ်ရဲ့မြို့တော်၊ လွိုင်ကော်မြို့မှာ ပုံမှန်အတိုင်းပြန်လည်စည်ကားနေပေမယ့် အချိန်မရွေး တိုက်ပွဲတွေ ပြန်လည်ဖြစ်ပွားလာနိုင်တဲ့အတွက် လက်ရှိအချိန်မှာ ပြည်သူတွေဟာ သတိနဲ့ နေနေကြရတယ်လို့ ဒေသခံတွေထံကနေ သိရပါတယ်။

လွိုင်ကော်မြို့ကို နစကတပ်ဖွဲ့က ပြန်လည်ထိန်းချုပ်ပြီးနောက် လက်ရှိအချိန်မှာ တက္ကသိုလ်တွေ၊ ဈေးတွေ ပုံမှန်အတိုင်းပြန်လည်ဖွင့်လှစ်ကာ မြို့တွင်းမှာစည်ကားနေပေမယ့် မြို့နေလူထုက စိတ်ချလက်ချတော့ မနေထိုင်ရဲကြသေးပဲ တိုက်ပွဲပြန်လည်ပြန်လည်ဖြစ်ပွားလာနိုင်တာကြောင့် ဘေးလွတ်ရာရှောင်တိမ်းဖို့ အသင့်ပြင်ထားတယ်လို့ ဆိုပါတယ်။

“လက်ရှိကာလက တည်ငြိမ်မှုမရှိသေးတဲ့ ကာလလို့ ပြောလို့ရတယ်။ ရွေးကောက်ပွဲရှိတဲ့အတွက် လွိုင်ကော်ကို အလုံးစုံပြန်ထိန်းချုပ်ထားနိုင်တယ်ဆိုတဲ့ သဘောပါပဲ။ တဖက်က ဝင်လာရင် စစ်ရှောင်ဖို့ရာ အဆင်သင့် ပြင်ထားရတယ်။ အရင်လိုတော့ အေးအေးချမ်းချမ်းစိတ်လွတ်ကိုယ်လွတ် မနေရဲသေးဘူး”လို့ ဒေသခံတယောက်က VOMကို ပြောပါတယ်။

ပြီးခဲ့တဲ့ စက်တင်ဘာလအတွင်းက မိုးသည်းထန်စွာရွာသွန်းပြီး ရေကြီးရေလျှံမှုကြောင့် ဘီလူးချောင်း အမှတ်(၂)ရေအားလျှပ်စစ်ဓာတ်အားပေး စက်ရုံဝန်း (လောပိတ)ထဲ ကို ရေတွေ စတင်ဝင်ရောက်လာပြီး လျှပ်စစ်ဓတ်အားပေးစက်တွေ ပျက်စီးခဲ့တာကြောင့် လွိုင်ကော်မြို့ပေါ်မှာလည်း လျှပ်စစ်မီး ပြတ်တောက်နေတာ တလကျော် ရှိနေပြီဖြစ်တယ်လို့ သိရပါတယ်။

ဒါ့အပြင် လွိုင်ကော်မြို့တွင်းမှာ ဆန်ဈေး၊ ဆီဈေး၊ စက်သုံးဆီဈေး၊ ဆေးဝါးတွေနဲ့ စားနပ်ရိက္ခာတွေဟာ ပုံမှန်ထက် ဈေးကြီးမြင့်စွာဝယ်ယူသုံးစွဲနေရပြီး မြို့ပေါ်မှာ အလုပ်အကိုင်အခွင့်အလမ်းကလည်း မရှိသလောက် ရှားပါးနေသလို စစ်ဆေးရေးတင်းကြပ်မှုတွေကြောင့် ကုန်ပစ္စည်းသယ်ယူဖို့ ခက်ခဲနေတယ်လို့လည်း သိရပါတယ်။

လွိုင်ကော်မြို့ကနေရာတချို့ကို ဒေသတွင်းလက်နက်ကိုင်တပ်ဖွဲ့တွေက ၁၁၁၁စစ်ဆင်ရေးကာလအတွင်း ထိန်းချုပ်နိုင်ခဲ့တာရှိပေမယ့် ပြီးခဲ့တဲ့ ဇွန်လကစတင်ပြီး နစကကတပ်ဖွဲ့က ပြန်လည်ထိန်းချုပ်ကာ အုပ်ချုပ်ရေးယန္တရားတွေ ပြန်လည်ပတ်နေတာဖြစ်သလို လက်ရှိအချိန်မှာတော့ မြို့တွင်းမှာ ပြန်လည်စည်ကားလာနေပြီဖြစ်တယ်လို့ သိရပါတယ်။

ဓာတ်ပုံ-ဒေသခံ