ယူကရိန်းနယ်စပ် ၅၀ ကီလိုမီတာအကွာထိ မြောက်ကိုရီးယားစစ်သားတွေ ရောက်ရှိနေ



ကိဗ်ယက်၊ အောက်တိုဘာ-၃၁-၂၀၂၄
မျိုးဆက်(VOM)

ရုရှားရှိ မြောက်ကိုရီးယား စစ်သားတွေဟာ ယူကရိန်းနယ်စပ်ကနေ ကီလိုမီတာ ၅၀ အကွာမှာ ရောက်ရှိနေပြီလို့ ယူကရိန်း တာဝန်ရှိသူတယောက်ကို ကိုးကားပြီး ဖိုင်နယ်ရှယ်တိုင်းမ်သတင်းဌာနက ဖော်ပြလာပါတယ်။

ရုရှားကို စေလွှတ်ထားပြီးဖြစ်တဲ့ မြောက်ကိုရီးယားစစ်သား ၃၀၀၀ ကို ကာ့စ်ဒေသကနေ အရပ်ဘက်ကားတွေနဲ့ ယူကရိန်းနယ်စပ်အနီးကို လျှို့ဝှက်ပို့ဆောင်ခဲ့တာလို့ ယူကရိန်းထောက်လှမ်းရေးအဖွဲ့ကို ကိုးကားပြီး အဲဒီသတင်းစာက ဖော်ပြထားပါတယ်။

ယူကရိန်းနယ်စပ်ကနေ ကီလိုမီတာ ၅၀ အကွာမှာရောက်ရှိနေတဲ့ မြောက်ကိုရီးယားစစ်သားတွေဟာ ပြီးခဲ့တဲ့ တနင်္လာနေ့မှာတော့ စစ်တန်းလျားတွေမှာ နေရာချထားပေးခဲ့ပြီး စစ်သား ၃၀၀၀ ထဲမှာ အထူးတပ်ဖွဲ့ဝင် ရာဂဏန်းပါဝင်တယ်လို့ ဆိုပါတယ်။

ယူကရိန်းအရာရှိတွေကတော့ မြောက်ကိုရီးယားတပ်တွေရဲ့ လုပ်ရည်ကိုင်ရည်နဲပ တိုက်ခိုက်ရေးစွမ်းရည်ကို မေးခွန်းထုတ်ခဲ့ပြီး လက်တွေ့တိုက်ပွဲ တခါမှမတိုက်ဖူးခဲ့တဲ့အတွက် သူတို့ရဲ့ အတွေ့အကြုံဟာ ခေတ်သစ်စစ်ပွဲတွေနဲ့ အလွန်ဝေးကွာတယ်လို့ သုံးသပ်ကြပါတယ်။

မြောက်ကိုရီးယား စစ်သားအနည်းငယ်ဟာ ယူကရိန်းပိုင်နက်ထဲရောက်ရှိနေပြီလို့ အနောက်အုပ်စုထောက်လှမ်းရေး သတင်းရင်းမြစ်နှစ်ယောက်ကို ကိုးကားပြီး စီအင်န်အင်န်သတင်းဌာနက ဖော်ပြထားပေမယ့် ဒီကိစ္စအပေါ် အမေရိကန်ကတော့ အတည်ပြုခြင်းမရှိသေးပါဘူး။

ဒီအတောအတွင်း မြောက်ကိုရီးယားနိုင်ငံခြားရေးဝန်ကြီး ချိုဆန်ဟွေဟာ ရုရှားနိုင်ငံခြားရေးဝန်ကြီး ဆာဂေးလပ်ရော့ဗ်အပါအဝင် ရုရှားတာဝန်ရှိသူတွေနဲ့ဆွေးနွေးဖို့ မော်စကိုရောက်ရှိနေပြီး သူမဟာ သမ္မတပူတင်နဲ့တော့ တွေ့ဖို့အစီအစဉ်မရှိဘူးလို့ ရုရှားသမ္မတနန်းတော်က ထုတ်ပြန်ထားပါတယ်။

Ref:NHK
Photo:CNN

Related posts

Leave a Comment

VOM News

FREE
VIEW