ပခုက္ကူ -ဇွန် -၂၈-၂၀၂၆
VOM
မကွေးတိုင်း ပခုက္ကူမြို့မှာ ဒီနေ့ ဇွန် ၂၈ ရက်ညနေက ခရိုင်ရဲတပ်ဖွဲ့မှူးဟာ ကိုယ့်ကိုယ်ကိုယ် ကတ်ကြေးနဲ့ထိုးတဲ့ဖြစ်စဥ်ဖြစ်လို့ အရေးပေါ်ဆေးရုံတင်ရသလို မြို့နယ်ရဲတပ်ဖွဲ့မှူးလည်း မြို့လယ်ခေါင် ကားတိုက်မှုဖြစ်လို့ အရေးပေါ်ဆေးကုသမှုခံယူနေရပါတယ်။
ဒီနေ့ ဇွန် ၂၈ ရက် ညနေ ၅ နာရီ ၂၀ မိနစ်အချိန်ခန့်က ပခုက္ကူမြို့၊ အမှတ် (၁၄) ရပ်ကွက်၊ အရင်ဇက်ဆိပ်ကိုသွားတဲ့ အုတ်ရိုးနီတံတားတောင်ထိပ်အနီးမှာ ပခုက္ကူခရိုင်ရဲတပ်ဖွဲ့မှူး ဒုတိယရဲမှူးကြီး သန်းဝင်းဟာ မိမိကိုယ်ကိုယ် သေကြောင်းကြံစည်ရန် ကြိုးပမ်းမှုတရပ် ဖြစ်ခဲ့ကြောင်းသိရပါတယ်။
ဒီဖြစ်စဥ်ကိုသိတဲ့ ရပ်ကွက်အုပ်ချုပ်ရေးအဖွဲ့ဝင်တယောက်ပြောပြတာက
” ခရိုင်ရဲတပ်ဖွဲ့မှူး အမှတ် (၁၄) ရပ်ကွက်၊ အုတ်ရိုးနီတံတားတောင်ထိပ်နာက အကင်ဆိုင်က ကတ်ကြေးနဲ့ သံပုရာသီး တောင်းခဲ့ပြီး ကားအတွင်း ပြန်ဝင်သွားတယ်။ တပည့်တွေကတားတယ် တပည့်တွေ ကန်ကျောက်ဖယ်ရှားပြီး ကားတံခါးကို Lock ချတယ်။ ကတ်ကြေးနဲ့ ကိုယ့်လည်ပင်းကိုထိုးနေတာမှာ ဆရာတော်တပါး ရောက်လာခဲ့ပြီး နောက်တံခါဖွင့် ဆေးရုံပို့လိုက်ရတယ်” လို့ပြောပြပါတယ်။
ခရိုင်ရဲတပ်ဖွဲ့မှူးရဲ့ အသက်အန္တရာယ် စိုးရိမ်ရမှု ရှိ၊ မရှိ အသေးစိတ်ကို လက်ရှိအချိန်အထိ အတည်မပြုနိုင်သေးပါဘူး။ လောလောဆယ်တော့ လိုအပ်တဲ့ အရေးပေါ် ဆေးကုသမှု ခံယူနေကြောင်း သိရပြီး ဘာ့ကြောင့် ခုလို အဆုံးစီရင်ဖို့ ကြိုးပမ်းသလဲဆိုတာ သက်ဆိုင်ရာ တာဝန်ရှိသူတွေက ဆက်လက်စုံစမ်းစစ်ဆေးနေတယ်လို့ သတင်းရရှိပါတယ်။
မေလ (၁၂) ရက်နေ့ ည (၁၀) နာရီကျော်ခန့်ကလည်း ပခုက္ကူမြို့၊ မြို့မလမ်းရှိ ‘စစ်သည်တော်’ စားသောက်ဆိုင်ရှေ့မှာ ပခုက္ကူမြို့နယ်ရဲတပ်ဖွဲ့မှူး ရဲမှူးနိုင်လင်းဆွေနဲ့ ညီဖြစ်သူ မောင်းတဲ့ကား တိမ်းမှောက်လို့ ၂ယောက်လုံး ခုချိန်ထိ ဆေးရုံက မဆင်းရသေးဘူးလို့သိရပါတယ်။
