ဦးကိုနီနဲ့ ကိုနေဝင်းတို့အမှုက တရားခံတွေကို ပြစ်ဒဏ်တိုးမြှင့်ပေးဖို့ ထပ်မံအယူခံဝင်

ဦးကိုနီနဲ့ ကိုနေဝင်းတို့အမှုက တရားခံတွေကို ပြစ်ဒဏ်တိုးမြှင့်ပေးဖို့ ထပ်မံအယူခံဝင်

နေပြည်တော်၊ စက်တင်ဘာ ၁-၂၀၂၀

စွမ်းရဲထွဋ် (VOM)

ဦးကိုနီနဲ့ အငှားယာဉ်မောင်း ကိုနေဝင်းတို့အမှုမှာပါဝင်တဲ့ တရားခံတွေကို ချမှတ်ထားတဲ့ ပြစ်ဒါဏ်တွေကို တိုးမြှင့်ပေးဖို့အတွက် သူတို့ရဲ့ ရှေ့နေတွေက ဒီကနေ့ နေပြည်တော်မှာရှိတဲ့ ပြည်ထောင်စုလွှတ်တော်ချုပ်ရုံးကို ထပ်မံ အယူခံဝင်လျှောက်လဲခဲ့ပါတယ်။

“ကျနော်ကတော့ ကိုဇေယျာဖြိုးကို စွဲချက်တင်ထားတာ ၃၀၂/၃၄/၁၀၉ နဲ့ စွဲချက်တင်ထားတာ။ အဲ့ဒါကို အပြစ်ပေးတာက ရာဇသတ်ကြီး ၂၀၁ ပထမပိုင်းနဲ့ အပြစ်ပေးထားတာဆိုတော့ ဒါ နည်းနည်းလွဲတယ်။ လွဲတယ်ဆိုတဲ့အကြောင်းကို ကျနော်တို့က အဆင့်ဆင့်ရုံးကို တင်တယ်။ အဲ့ဒါ မရတော့ အထူးအယူခံဝင်ခွင့်ပေးဖို့တင်တာ”လို့ ဦးကိုနီ မိသားစုဖက်မှ ရှေ့နေ ဦးခင်မောင်ဌေးက သတင်းမီဒီယာတွေကို ပြောပါတယ်။

ရာဇသတ်ကြီးပုဒ်မ-၂၀၁ ပထမပိုင်းဟာ ပြစ်မှုတစ်ခုဖြစ်ပြီးတဲ့နောက်မှာ အမှုကလွတ်ဖို့၊ ထွက်ပြေးနိုင်ဖို့ အစရှိတဲ့ နက်နက်နဲနဲ ပက်သက်ကူညီတာဖြစ်ပြီး ပုဒ်မ-၁၀၉ ဆိုတာကတော့ အစကတည်းက စီစဉ်တဲ့နေရာမှာပါပြီး တောက်လျှောက် ကိုယ်တိုင်ပြစ်မှုကျူးလွန်တဲ့နေရာမှာမရှိပေမယ့်လည်း အကြံဉာဏ်ပေးတာတွေ၊ ထောက်ပံ့ပေးတာတွေ၊ ကူညီတာတွေ လုပ်ခဲ့တာဖြစ်တယ်လို့ ဦးခင်မောင်ဌေးကပြောပါတယ်။

“အဲ့ဒီတော့ စကတည်းက ပါတဲ့လူနဲ့ နောက်မှပါတဲ့လူ အခြေအနေချင်းက ကွာတာပေါ့ဗျာ။ ၁၀၉ ရဲ့ ပြစ်ဒါဏ်က ကြည်လင်းတို့၊ ကိုအောင်ဝင်းဇော်တို့ ချထားတဲ့ ပြစ်ဒါဏ်နဲ့ အတူတူသွားမှာ ၂၀၁ ပထမပိုင်းရဲ့ ပြစ်ဒါဏ်က ၇ နှစ်ပဲလေ။ ပြစ်ဒါဏ်လည်း တအားကွာပါတယ်။ ပြုလုပ်ဆောင်ရွက်မှုတွေလည်း ကွာပါတယ်။ ပြစ်မှုကျူးလွန်တဲ့ ရည်ရွယ်ချက်ချင်းလည်း အများကြီးကွာပါတယ်”လို့ ဦးခင်မောင်ဌေးကပြောပါတယ်။

ဦးကိုနီကို လုပ်ကြံတဲ့အမှုက ရုတ်တရက် ဖြစ်လာတာမဟုတ်ဘဲ အရင်စီစဉ်ပြီးမှ အုံကျင်းဖွဲ့ပြီးဖြစ်လာတာကြောင့် ရေဆုံးမြေဆုံး လိုက်သင့်တယ်လို့လည်း ဦးခင်မောင်ဌေးက ပြောပါတယ်။

အရင် ၂၀၁၉ ခုနှစ်၊ နိုဝင်ဘာလ ၂၆ ရက်နေ့ကလည်း ဦးကိုနီနဲ့ ကိုနေဝင်းတို့ဖက်က ရှေ့နေတွေဟာ ပြည်ထောင်စုတရားလွှတ်တော်ကို ပြင်ဆင်ချက်တင်သွင်းခဲ့ပြီး အဲ့ဒီ ပြင်ဆင်ချက်လျှောက်ထားတာကို  ပြည်ထောင်စုတရားလွှတ်တော်ချုပ်ရုံးက ဇန်နဝါရီလ ၁၀ ရက်နေ့မှာ ပယ်ချခဲ့တယ်လို့ သိရပါတယ်။

လက်ရှိ ဦးကိုနီနှင့် ကိုနေဝင်းတို့အမှုနဲ့ ပက်သက်နေတဲ့ တရားခံတွေထဲက ဇေယျာဖြိုးကို ထောင်ဒဏ် ၅ နှစ်ချမှတ်ထားပြီး အောင်ဝင်းထွန်းကိုတော့ ထောင်ဒဏ် ၃နှစ်ချမှတ်ခဲ့ကာ ချုပ်ရက်တွေနဲ့ တွက်ကြည့်မယ်ဆိုရင် ချမှတ်ထားတဲ့ ပြစ်ဒါဏ်တွေဟာ စတိသဘောသာဖြစ်နေတယ်လို့ တရားလွှတ်တော်ရှေ့နေ ဦးရောဘတ်စန်းအောင်က သတင်းမီဒီယာတွေကို ပြောပါတယ်။

“သက်သာတဲ့ ပုဒ်မကို ပြောင်းပြီး သက်ညှာတဲ့ ပြစ်ဒါဏ်တွေကိုချတာဟာ မြန်မာနိုင်ငံရဲ့ တရားစီရင်ရေးမှာ တရားဥပဒေစိုးမိုးရေးအတွက် လိုအပ်တဲ့ အုတ်တစ်ချက်လပ်သွားတယ်လို့ ကျနော်တို့က ယုံကြည်တဲ့အတွက် စွဲချက်အတိုင်းပြန်တင်ပြီးတော့ ထိုက်သင့်တဲ့ ပြစ်ဒဏ်ကို ဆောင်ရွက်ဖို့အတွက် အထူးအယူခံဝင်တာပါ။ တရားစီရင်ထုံးတွေ အမြင့်ဆုံးတရားရုံးတွေရဲ့ ညွှန်ကြားချက်တွေရဲ့ ညွှန်ကြားချက်တွေမှာလည်း စတိပြစ်ဒဏ် မချပါနဲ့ ပြစ်မှုကို ဟန့်တားလောက်တဲ့ ပြစ်ဒဏ်ချဖို့ပဲ ညွှန်ကြားထားတယ်။ ဒါမျိုးတွေ နောက်ထပ်ပေါ်မလာစေချင်လို့ပါ။ ဂဠုန်ဦးစောအမှုမှာ ထိထိရောက်ရောက်လုပ်လိုက်တဲ့အခါကျတော့ နှစ် ၃၀၊ ၄၀ တွန့်သွားတယ်။ အခုလည်း ကျနော်တို့က နိုင်ငံနဲ့အဝှမ်း တရားဥပဒေစိုးမိုးရေးနဲ့ လုပ်ကြံသတ်ဖြတ်ရေးလုပ်ငန်းစဉ်တွေ အဟန့်အတားဖြစ်အောင်ဆိုတဲ့ သဘောမျိုးနဲ့ ပြန်ကြားနာပြီး ထိုက်သင့်တဲ့ ပြစ်ဒါဏ်ကို တိုးမြှင့်ပေးဖို့အတွက် ရာဇဝတ်အထူးအယူခံဖွင့်ပေးပါလို့ လာလျှောက်ခြင်းပဲဖြစ်ပါတယ်”လို့ အငှားယာဉ်မောင်း ကိုနေဝင်းရဲ့ ဇနီး ဒေါ်စုသက်ခိုင်ရဲ့ ရှေ့နေ ဦးရောဘတ်စန်းအောင်က ပြောပါတယ်။

ဦးကိုနီအမှုရဲ့ အဓိကတရားခံတွေဖြစ်တဲ့ သေနတ်သမားကြည်လင်းနဲ့ လုပ်ကြံမှုကို စေခိုင်းသူ အောင်ဇော်ဝင်းကို ပြီးခဲ့တဲ့ ၂၀၁၉ ခုနှစ်၊ ဖေဖော်ဝါရီလ ၁၅ ရက်နေ့မှာ ရန်ကုန်မြောက်ပိုင်းခရိုင်တရားရုံးက သေဒဏ်ထိုက်စေတဲ့ပုဒ်မ ၃၀၂(၁)(ခ)/၃၄ နဲ့ မသေမချင်း ကြိုးကွင်းစွပ်သတ်ဖို့ အမိန့်ချမှတ်ခဲ့ပြီးဖြစ်တယ်လို့ သိရပါတယ်။

ဦးကိုနီအမှုအတွက် ရန်ကုန်မြောက်ပိုင်းခရိုင်တရားရုံးက အချိန် ၂ နှစ်ကျော်ကြာ ရုံးချိန်းပေါင်း ၁၀၄ ချိန်း၊ စုစုပေါင်းသက်သေ ၁၁၀ တို့ကို စစ်ဆေးပြီးမှ အမိန့်ချမှတ်ခဲ့တာဖြစ်တယ်လို့လည်း သိရပါတယ်။

#voiceofmyanmar #VOM #နေပြည်တော်

Zawgyi