Month: March 2023

ရီယတ်၊ မတ်-၂၉-၂၀၂၃ မျိုးဆက်(VOM) ဆော်ဒီအာရေဗျမှာ ဘတ်စ်ကားတစ်စီးတိမ်းမှောက်မှုကြောင့် ဘုရားဖူး၂၀ ဦး သေဆုံးပြီး ၂၉ ဦးဒဏ်ရာရရှိသွားတယ်လို့ ဒေသတွင်းသတင်းဌာနတွေက မတ် ၂၈ ရက်မှာ ရေးသားဖော်ပြထားပါတယ်။ နိုင်ငံအနောက်တောင်ပိုင်း အဆာပြည်နယ်ရှိတံတားတစင်းပေါ်မှာ အစ္စလာမ်တို့ရဲ့ အထွတ်အမြတ်ထားရာ မက္ကာမြို့ကို ဘုရားဖူးများအားပို့ဆောင်တဲ့ ဘတ်စ်ကားတိမ်းမှောက်မီးလောင်ခဲ့ခြင်းဖြစ်ကြောင်း တာ၀န်ရှိသူတွေကပြောပါတယ်။ ဘတ်စ်ကားတိမ်းမှောက်မီးလောင်ရတဲ့ အကြောင်းရင်းကို အာဏာပိုင်တွေက စုံစမ်းစစ်ဆေးနေဆဲဖြစ်ပြီး ဘတ်စ်ကားဟာ ဘရိတ်ပြဿနာကြောင့် မတော်တဆမှုဖြစ်ပွားခဲ့တာလို့ ဒေသတွင်းသတင်းဌာနတွေကဖော်ပြထားပါတယ်။ သေဆုံးသူတွေထဲမှာ အခြားနိုင်ငံသားတွေပါ၀င်ပေမယ့် ဆော်ဒီနိုင်ငံသားအများစုပါ၀င်ကြောင်း တာ၀န်ရှိသူတွေကပြောပါတယ်။ ၂၀၁၆ ခုနှစ်မှာ မက်ဒီနာကနေ မက္ကာကိုသွားတဲ့ ဘုရားဖူးကားတိမ်မှောက်မှုကြောင့် လူ ၁၉ ဦးသေဆုံးခဲ့ပါတယ်။ ဒါ့အပြင်၂၀၁၉ ခုနှစ်ကလည်း မက္ကာသို့ဘုရားဖူးသွားရောက်စဉ် ယာဉ်မတော်တဆမှုကြောင့် အာရပ်နဲ့ အာရှနိုင်ငံသား ၃၅ ဦးသေဆုံးခဲ့တယ်လို့လည်း သိရပါတယ်။ Ref:BBC #voiceofmyanmar #VOM #ရီယတ်

ပြုံးယမ်း၊ မတ်-၂၈-၂၀၂၃ မျိုးဆက်(VOM) မြောက်ကိုရီးယားရဲ့ လက်နက်ထုတ်လုပ်မှုကို အရှိန်မြှင့်ဖို့ ခေါင်းဆောင်ကင်ဂျုံအန်က ညွှန်ကြားခဲ့ကြောင်း မြောက်ကိုရီးယားနိုင်ငံပိုင်သတင်းဌာနက မတ် ၂၈ ရက်မှာ ပြောပါတယ်။ ကင်ဂျုံအန်ဟာ နိုင်ငံရဲ့နျူကလီးယားအစီအစဉ်နဲ့ လက်နက်ထုတ်လုပ်ရေးလုပ်ငန်းတွေကို မတ် ၂၇ ရက်မှာ စစ်ဆေးခဲ့ပြီးနောက် အခုလိုညွှန်ကြားခဲ့တာဖြစ်ကြောင်း နိုင်ငံပိုင်သတင်းဌာနက ရေးသားဖော်ပြထားပါတယ်။ နိုင်ငံရဲ့ လက်နက်အင်အားတိုးတက်လာစေဖို့ အတွက် လက်နက်အဆင့်နျူကလီးယားပစ္စည်းတွေ ထုတ်လုပ်မှုကို အရှိန်မြှင့်ဖို့ ကင်ဂျုံအန်က တာ၀န်ရှိသူတွေကို ညွှန်ကြားခဲ့ကြောင်းသိရပါတယ်။ မြောက်ကိုရီးယားဟာ မတ် ၂၇ ရက်မှာ မြေပြင်ကနေ မြေပြင်ပစ်ဒုံးကျည်နှစ်စင်းကို နိုင်ငံအရှေ့ဘက်ကျွန်းတကျွန်းဆီသို့ ဦးတည်ပစ်ခတ်ခဲ့ကြောင်း ဖော်ပြထားပြီး ဒုံးကျည်ပစ်လွှတ်မှုကို တောင်ကိုရီးယားစစ်တပ်ကလည်း အတည်ပြုထုတ်ပြန်ထားပါတယ်။ မြောက်ကိုရီးယားဟာ တောင်ကိုရီးယားနဲ့ အမေရိကန်တို့ရဲ့ ပူးတွဲစစ်ရေးလေ့ကျင့်မှုတွေကို ကြိမ်ဖန်များစွာ ပြစ်တင်ပြောဆိုထားပြီး ဒါဟာကျူးကျော်ဖို့ပြင်ဆင်နေတဲ့ လုပ်ရပ်ဖြစ်ကြောင်း ထုတ်ဖော်ပြောဆိုထားပါတယ်။ Ref: NHK #voiceofmyanmar #VOM #ပြုံးယမ်း

ကိယက်ဗ်၊ မတ်-၂၈-၂၀၂၃ မျိုးဆက်(VOM) ယူကရိန်းဟာ ရုရှားတပ်တွေကိုထိုးစစ်ဆင်ဖို့ပြင်ဆင်နေချိန်မှာ အနောက်အုပ်စုနိုင်ငံတွေက နာမည်ကျော်တင့်ကားတွေ ပေးပို့ထောက်ပံ့မှုတွေ စတင်ရရှိနေပြီဖြစ်ပါတယ်။ မတ် ၂၇ ရက်မှာ ဗြိတိန်ရဲ့ Challenger 2 တင့်ကားတွေနဲ့ အမေရိကန် ဂျာမနီတို့ဆီက သံချပ်ကာယာဉ်တွေ လက်ခံရရှိခဲ့ကြောင်း ယူကရိန်းကာကွယ်ရေး၀န်ကြီးကပြောပါတယ်။ လွန်ခဲ့တဲ့တနှစ် စစ်ပွဲစချိန်မှာ မိတ်ဖက်တွေရဲ့ပံ့ပိုးကူညီမှု အခုလောက်ထိရရှိလိမ့်မယ်ဆိုတာ ဘယ်သူမှ ထင်မှတ်မထားကြောင်း အခုလိုထောက်ပံ့မှုအတွက် ကျေးဇူးတင်တယ်လို့ သူကပြောပါတယ်။ ဂျာမနီကလည်း သူ့ရဲ့ Leopard 2 တင့်ကား ၁၈ စီးကို ယူကရိန်းကို လွှဲပြောင်းပေးအပ်လိုက်ပြီး နော်ဝေကလည်း ဂျာမနီလုပ် Leopard 2 တင့်ကားရှစ်စီးကို ယူကရိန်းမှာ ဖြန့်ကြက်ထားပြီးဖြစ်တယ်လို့ ပြောပါတယ်။ ဒီအတောအတွင်း ရုရှားတွေသိမ်းပိုက်ထားတဲ့ ဇာပိုရစ်ဇီးယား နျူကလီးယားဓါတ်အားပေးစက်ရုံ လုံခြုံရေးကို စိုးရိမ်ပူပန်ကြောင်း ယူကရိန်းသမ္မတဇီလန်စကီးက ထုတ်ဖော်ပြောဆိုထားပါတယ်။ Ref: NHK #voiceofmyanmar #VOM #ကိယက်ဗ်

ဂျေရုဆလင်၊ မတ်-၂၈-၂၀၂၃ မျိုးဆက်(VOM) အစ္စရေးတရားစီရင်ရေးစနစ်ပြုပြင်ပြောင်းလဲမယ့် အစီအစဉ်တွေကို ဆိုင်းငံ့ထားမယ်လို့ ၀န်ကြီးချုပ်နေတန်ယာဟုက မတ် ၂၇ ရက်မှာ ကြေညာလိုက်ပါတယ်။ အစ္စရေးပြည်သူတွေအကြား စည်းလုံးညီညွတ်မှုပျက်ပြားခြင်းမဖြစ်စေဖို့ အဲဒီအစီအစဉ်ကို ခေတ္တဆိုင်းငံ့မယ်လို့ ၀န်ကြီးချုပ်နေတန်ယာဟုကပြောပါတယ်။ ဒါပေမယ့် အချိန်ဘယ်လောက် ဆိုင်းငံ့မယ်ဆိုတာကို ရှင်းလင်းစွာမသိရသေးပါဘူး။ အခုလိုတရားစီရင်ရေးစနစ်ပြုပြင်ပြောင်းလဲမှုကို ဆန့်ကျင်ပြောဆိုခဲ့တဲ့ အစ္စရေးကာကွယ်ရေး၀န်ကြီးကို ရာထူးကနေ ထုတ်ပယ်လိုက်ပြီးနောက် နိုင်ငံတွင်းမှာ ဆန္ဒပြမှုတွေပိုမိုပြင်းထန်လာခဲ့ပါတယ်။ ဆန္ဒပြမှုတွေကြောင့် စျေးဆိုင်တွေကနေ ဘဏ်တွေ ဆေးရုံတွေထိ ၀န်ဆောင်မှုတွေ ရပ်ဆိုင်းခဲ့ရခဲ့ရပြီး နိုင်ငံသမိုင်းမှာ အကြီးမားဆုံးအကျပ်အတည်းဖြစ်ကြောင်း အတိုက်အခံခေါင်းဆောင် လာပစ်က ပြောပါတယ်။ အစ္စရေးလက်ယာယိမ်းအစိုးရရဲ့ တရားစီရင်ရေးစနစ်ပြုပြင်ပြောင်းလဲမယ့် အစီအစဉ်တွေထဲမှာ တရားသူကြီးတွေ ရွေးချယ်ခန့်အပ်မယ့် ကော်မတီကို ထိန်းချုပ်ဖို့်ကြိုးပမ်းမှုတွေပါ၀င်ပြီး ဒါဟာ ဒီမိုကရေစီကိုခြိမ်းခြောက်တဲ့ လုပ်ရပ်ဖြစ်ကြောင်း အတိုက်အခံတွေက ဝေဖန်ပြောဆိုထားပါတယ်။ Ref:BBC Photo:Reuters #voiceofmyanmar #VOM #ဂျေရုဆလင်