မေ ၁၅ – ၂၀၂၄
SN (VOM)
လက်ရှိ ပြည်တွင်းရွှေဈေးနှုန်းမှာ သမိုင်းတလျှောက် စံချိန်တင် အမြင့်ဆုံးအဖြစ် တကျပ်သား ကျပ် ၄၉ သိန်းကျော်ကို ရောက်ရှိလာတယ်လို့ ဈေးကွက်အတွင်းက သိရပါတယ်။
ကျပ်ငွေတန်ဖိုး ကျဆင်းလာခြင်းကြောင့် နိုင်ငံခြားငွေလဲနှုန်းတွေ မြင့်တက်လာခြင်းနဲ့အတူ လက်ရှိမှာ ကမ္ဘာ့ရွှေဈေးနှုန်းတွေလည်း မြင့်တက်နေတဲ့အတွက် ဒီကနေ့ မေ ၁၅ ရက် မနက်ပိုင်းမှာတော့ ပြည်တွင်းရွှေဈေးနှုန်းဟာ ကျပ် လေးဆယ့်ကိုးသိန်း နှစ်သောင်းဝန်းကျင်ကို ရောက်ရှိလာတယ်လို့ သိရပါတယ်။
“၄၉ သိန်းကျော်ကတော့ အမြင့်ဆုံးဈေးပေါ့။ တခါမှ မဖြစ်ဖူးသေးဘူး။ စံချိန်ချိုးသွားတာပေါ့။ ဒေါ်လာဈေးတက်တာရယ်၊ ကမ္ဘာ့ရွှေဈေး တက်တာရယ်၊ နိုင်ငံရေး အခြေအနေတွေကြောင့်ရော အားလုံး ပေါင်းစုံသွားတဲ့အတွက် စံချိန်တင် တက်သွားတာပေါ့” လို့ ရွှေလုပ်ငန်းရှင်တယောက်က ပြောပါတယ်။
ပြည်တွင်းရွှေဈေးဟာ ပြီးခဲ့တဲ့ မေ ၈ ရက်က ကျပ် လေးဆယ့်ခုနစ်သိန်း ရှစ်သောင်းငါးထောင် ရှိခဲ့ရာကနေ တပတ်အတွင်း ကျပ် တသိန်းသုံးသောင်း ငါးထောင် မြင့်တက်လာတာ ဖြစ်ပါတယ်။
“နိုင်ငံရေး အခြေအနေတွေကြောင့် ဈေးကွက်မငြိမ်ဘူး။ အားလုံးကတော့ ဆက်စပ်နေတာပေါ့။ ဒေါ်လာဈေးနဲ့ ကမ္ဘာ့ရွှေဈေး ပြန်မကျရင်တော့ ပြည်တွင်းရွှေဈေးက မကျနိုင်တော့ဘူး” လို့ ရွှေလုပ်ငန်းရှင်က ပြောပါတယ်။
ကမ္ဘာ့ရွှေဈေးဟာ ပြီးခဲ့တဲ့ မေ ၈ ရက်က တအောင်စ ၂၃၀၄ ဒေါ်လာ ရှိခဲ့ရာက ဒီကနေ့ မေ ၁၅ ရက်မှာတော့ တအောင်စ ၂၃၅၇ ဒေါ်လာကို ရောက်ရှိနေပြီး တပတ်အတွင်း တအောင်စ ၅၃ ဒေါ်လာ မြင့်တက်လာတာ ဖြစ်ပါတယ်။
အမေရိကန်ဒေါ်လာဈေးကတော့ ပြီးခဲ့တဲ့ မေ ၈ ရက်က တဒေါ်လာ ၃၉၇၀ ကျပ်သာ ရှိခဲ့ပေမယ့် ဒီကနေ့မှာတော့ တဒေါ်လာ ၄၀၃၀ ကျပ်ကို ရောက်ရှိနေပြီး တပတ်အတွင်း တဒေါ်လာ ကျပ် ၆၀ မြင့်တက်လာတာ ဖြစ်ပါတယ်။
အခုလို ပြည်တွင်းက ပြင်ပရွှေဈေး နှုန်း မြင့်တက်လာတာနဲ့ ပတ်သက်လို့ ရန်ကုန်တိုင်းရွှေအသင်း ဥက္ကဋ္ဌ ဦးမျိုးမြင့်က လက်ရှိ ရွှေဈေးနှုန်းဟာ ကောလဟာလ လေပက်ကားတွေသာဖြစ်ပြီး ရွှေရောင်းဝယ်မှုကို အရေးကြီးဝန်ဆောင်မှုအဖြစ် သတ်မှတ်တော့မှာ ဖြစ်တာကြောင့် ရွှေဈေးကွက်ကို ပြန်လည် ထိန်းနိုင်တော့မှာ ဖြစ်တယ်လို့ ပြောပါတယ်။
“ရွှေရောင်းဝယ်ခြင်း လုပ်ငန်းကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်ဖို့ ဥပဒေရေးဆွဲနေပြီပေါ့။ အဲဒါ မကြာခင် ထွက်လာတော့မယ်။ အဲဒါပြီးလို့ရှိရင်တော့ ရွှေလောကမှာ ဈေးကစားတာတွေ၊ ဈေးနှုန်း မတည်မငြိမ်ဖြစ်တာတွေ မရှိတော့ပါဘူး။ အဲဒါနဲ့ အရေးယူဆောင်ရွက်သွားမယ့်အပိုင်း ရှိပါတယ်” လို့ YGEA ဥက္ကဋ္ဌက ပြောပါတယ်။
ရွှေရောင်းဝယ်မှုကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်နိုင်ဖို့ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနက ဗဟိုဘဏ်အပါအဝင် သက်ဆိုင်ရာဌာနအသီးသီးနဲ့ ပူးပေါင်း ရေးဆွဲ ဆောင်ရွက်နေပြီး မကြာမီ ဥပဒေ ထွက်ရှိလာတော့မှာ ဖြစ်တယ်လို့ သိရပါတယ်။
“ဒီလထဲမှာတော့ ဥပဒေ အတည်ပြုဖို့ မဖြစ်နိုင်သေးဘူး။ လက်ရှိမှာ ဥပဒေက ရေးဆွဲနေတယ်၊ မကြာခင် ထုတ်ပြန်တော့မယ်၊ ဒီလောက်ပဲ ပြောလို့ရမယ်။ အရေးယူဆောင်ရွက်မယ့် အပိုင်းကိုလည်း ဥပဒေမထွက်ခင် ကြိုပြောလို့ မရသေးဘူး” လို့ YGEA ဥက္ကဋ္ဌက ပြောပါတယ်။
YGEA ရဲ့ ဒီကနေ့ မေ ၁၅ ရက်၊ မနက်ပိုင်း အကယ်ဒမီ မီးလင်းရွှေဈေးကွက် အဖွင့်ဈေးနှုန်းကိုတော့ ကျပ် သုံးဆယ့်ကိုးသိန်း ကိုးသောင်း ကိုးထောင့်တရာ သတ်မှတ်ထားကာ ပြီးခဲ့တဲ့ မေ ၈ ရက်ကတော့ ကျပ် သုံးဆယ့်ကိုးသိန်း ကိုးသောင်း ကိုးထောင့်ခုနစ်ရာဈေး သတ်မှတ်ထားတာကြောင့် တပတ်အတွင်း ၆၀၀ ကျပ် ပြန်လည် ကျဆင်းလာတာကို တွေ့ရပါတယ်။
နစကလက်ထက်မှာ ရွှေဈေးနဲ့ ဒေါ်လာဈေးတွေကို ကိန်းဂဏန်းတခု တရားဝင် သတ်မှတ်ထားပေမယ့် ပြင်ပဈေးကွက်ထဲမှာတော့ နစက က သတ်မှတ်တဲ့ ဈေးနဲ့ အရောင်းအဝယ် ပြုလုပ်လို့မရတာကြောင့် သတ်မှတ်ဈေးထက် ပိုပေးရတဲ့ ပြင်ပ ပေါက်ဈေးတွေနဲ့ပဲ အရောင်းအဝယ် ပြုလုပ်နေကြတာ ဖြစ်တယ်လို့ သိရပါတယ်။
Photo:CJ
ပြည်တွင်းရွှေဈေး အမြင့်ဆုံးစံချိန်အဖြစ် တကျပ်သား ကျပ် ၄၉ သိန်းကျော်ထိ မြင့်တက်လာ
