သြဂုတ် ၂၀၊၂၀၂၂
KK(VOM)
ရန်ကုန်က မြို့နယ်အချို့မှာ ၂ရက်အတွင်း ပစ်ခတ်မှုနဲ့ဗုံးပေါက်ကွဲမှုတွေဖြစ်ခဲ့ရာ ရာအိမ်မှူး တဦးအပါအဝင် ၇ ဦး သေဆုံးခဲ့ပြီး ရာအိမ်မှူး ၂ဦးနဲ့အရပ်သားတဦး ထိခိုက်ဒဏ်ရာရရှိခဲ့တယ်လို့ အဆိုပါမြို့နယ်တွေဆီက သိရပါတယ်။
ဒီကနေ့ မနက် ၁၁နာရီက မြောက်ဥက္ကလာပမြို့နယ် ၊ ၂ ရပ်ကွက်၊ သုမာလာ ၈ လမ်းမှာ ဇနီးနဲ့စက်ဘီးစီးပြန်လာတဲ့ ရာအိမ်မှူးဦးသောင်းဒန်ကို အမည်မသိသေနတ်ကိုင်ဆောင်ထားသူတွေက ပစ်ခတ်ခဲ့လို့ ဒဏ်ရာရရှိပြီး မေဓါဝီဆေးရုံကို ပို့ဆောင်လိုက်ရတယ်လို့ မြို့ခံတဦးက ပြောပါတယ်။
တွံတေးမြို့နယ်၊ စျေးသစ်ရပ်ကွက်၊ မြိုမစျေးထဲမှာ စျေးရောင်းနေတဲ့ ဦးခင်မောင်မြင့်ကို အမည်မသိသေနတ်ကိုင်ဆောင်ထားသူတဦးက ပစ်ခတ်ခဲ့လို့ ဦးခေါင်းမှာ ကျည်ထိမှန်ဒဏ်ရာရရှိကာ တွံတေးမြို့မဆေးရုံကိုပို့ဆောင်ထားရတယ်လို့ မြို့ခံတဦးက ပြောပါတယ်။
ပစ်ခတ်ဗုံးပေါက်တဲ့ကိစွတွေနဲ့ပတ်သတ်ပြီး အုပ်ချုပ်ရေးနဲ့နီးစပ်သူတဦးက”ဒီလထဲမှာ မနည်းဘူး ပစ်တာ ခတ်တာတွေ၊ ဗုံးပေါက်တာတွေ ဟိုရက်က ပြန်နည်းသွားတယ် အခုရက်ပိုင်း ပြန်များလာတယ်”လို့ ပြောပါတယ်။
မနေ့ သြဂုတ် ၁၉ရက် ညပိုင်းကလည်း ကြည့်မြင်တိုင်မြိုနယ်၊ စက်ဆန်းရပ်ကွက်၊ ဖွံ့ဖြိုးရေးလမ်းရှိ ကျူးကျော်အိမ်တစ်အိမ်မှာ ဗုံးပေါက်ကွဲခဲ့ရာ အမျိုးသား ၆ ဦး ဗုံးစထိမှန်ပြီးသေဆုံးခဲ့တယ်လို့ စက်ဆန်းရပ်ကွက်နေသူတဦးက ပြောပါတယ်။
အလားတူ မနေ့မနက်ပိုင်းကလည်း ရွှေပြည်သာမြို့နယ်၊ ၁၅ ရပ်ကွက်၊ နီလာစျေးမှာ ရာအိမ်မှူး ဦးဝင်းဇော် သေနတ်နဲ့ပစ်သတ်ခံခဲ့ရသလို ရာအိမ်မှူးဟောင်း ဦးခင်မောင်စိုး ကိုလည်း သက်ဆိုင်ရာက ပစ်ခတ်ဖမ်းဆီးခဲ့တယ်လို့ မြို့ခံတွေဆီက သိရပါတယ်။
ရန်ကုန်က မြို့နယ်အချို့မှာ သြဂုတ်လ ၁ ရက်ကနေ သြဂုတ်၂၀ ရက်နေ့အတွင်း ပစ်ခတ်မှုနဲ့ဗုံးပေါက်ကွဲမှုတွေကြောင့် သေဆုံးသူ၂၀ဦးရှိကာ ဒဏ်ရာရရှိသူ ၂၁ဦးရှိပြီလို့ VOMက ပြုစုထားတဲ့မှတ်တမ်းတွေအရ သိရပါတယ်။
#voiceofmyanmar #VOM #ရန်ကုန်
