ရုပ်ရှင်မင်းသားကျော်သူပါဝင်တဲ့ ခြေဆယ့်တစ်လှမ်းရုပ်ရှင် ဇာတ်ကား ရုံတင်ရက်သတ်မှတ်ပြီးမှ ပြသခွင့်ဆိုင်းငံ့ခံရ

ဇန်နဝါရီ ၂၂ -၂၀၂၅

GG (VOM)

ရုပ်ရှင်သရုပ်ဆောင် ကျော်သူ ပါဝင်သရုပ်ဆောင်ထားတဲ့ “ခြေဆယ့်တစ်လှမ်းရုပ်ရှင်”ပြသခွင့် ဆိုင်းငံ ခံရတယ်လို့ သိရပါတယ်။

ခြေဆယ့်တစ်လှမ်းရုပ်ရှင်က လာမယ့်ဇန်နဝါရီ၂၄ ရက်နေ့မှာ ရန်ကုန်အပါအဝင် တနိုင်ငံလုံးကရုပ်ရှင်ရုံတွေမှာတပြိုက်နက်တည်း ရုံတင်ပြသခွင့်ရရှိထားပြီးမှ ရုပ်ရှင်ပြသခွင့်ကို ပြန်ကြားရေးဝန်ကြီးဌာနက ပြသခွင့်ရပ်ဆိုင်းလိုက်တာဖြစ်တယ်လို့ သိရပါတယ်။

ရုပ်ရှင်ပြသခွင့်ဆိုင်းငံခံရတာနဲ့ပတ်သက်ပြီး အဆိုပါရုပ်ရှင်ဇာတ်ကားကြီးရဲ့ ဇာတ်ညွှန်းဆရာမ မေခိုင်ကလည်း” ကျမရဲ့ ခြေ ၁၁ လှမ်း ရုပ်ရှင်ကား မပြဖြစ်တော့တဲ့ အတွက် ကျမဖိတ်ကြားထားသူ အားလုံးကိုအားနာပါတယ်။”လို့ သူရဲ့လူမှုကွန်ယက်ကနေအသိပေးထားပါတယ်။

ရုပ်ရှင်ထဲမှာ ပါဝင်သရုပ်ဆောင်ထားတဲ့ ရုပ်ရှင်သရုပ်ဆောင် အလင်းရောင်ကလည်း

” ခြေဆယ့်တစ်လှမ်းရုပ်ရှင်ကားကြီး မပြဖြစ်တော့လို့ ဒီနေ့ဖိတ်ကြားသူများအားလုံးကို အားနာရပါတယ်ခင်ဗျာ။”လို့ ပြောထားပါတယ်။

အလားတူ ခြေဆယ့်တစ်လှမ်းရုပ်ရှင် အမည်ရှိလူမှုကွန်ယက်စာမျက်နှာကနေလည်း

” premiere show ပျက်ပါတယ်။ ရုံတင်ရက်လည်းပျက်ပြယ်သွားပါပြီ။ ဖိတ်ကြားထားသူများအားလုံးကိုတောင်းပန်တယ်ဆ်ိုတာကလွဲပြီး တခြားပြောစရာမရှိတော့ပါဘူး။ အားလုံးကိုတောင်းပန်ပါတယ်” ဆိုပြီး အသိပေးထားပါတယ်။

အဆိုပါ ခြေဆယ့်တစ်လှမ်းရုပ်ရှင်မှာ ရုပ်ရှင်သရုပ်ဆောင် ကျော်သူ၊ မင်းသူ ၊အလင်းရောင်၊ ခင်ဝင့်ဝါ၊ မေပန်းချီတို့နဲ့အတူ တခြား အနုပညာရှင်တွေပါဝင်သရုပ်ဆောင်ထားတယ်လို့သိရပါတယ်။

ခုလို ရုပ်ရှင်ပြသခွင့်ရပ်ဆိုင်းခံရတဲ့အပေါ် ရုပ်ရှင်နဲ့ ဗီဒီယိုထုတ်လုပ်ရေးလုပ်ကိုင်သူက

” ကျွန်တော်တို့ထင်တာတော့ ကျော်သူပါလို့ဆိုင်းငံ့လိုက်သလားပဲ။ အခုကရုံးငှားစနစ်နဲဲပြနေကြတာလေ။ ဒီကားကလည်းရိုက်ထားတာကြာပြီ။ အခုမှပြသဖို့ရက်ရတာကို ခုလို ဆိုင်းငံ့ခံလိုက်ရတာပေါ့။ပြန်ပြခွင့်ပေးမပေး မပြောနိုင်ပါဘူး။ ” လို့မှတ်ချက်ပြုပြောပါတယ်။

ခြေဆယ့်တစ်လှမ်းရုပ်ရှင်ကားကြီးဟာ သရုပ်ဆောင် ကျော်သူ မြန်မာနိုင်ငံထဲမှာနေထိုင်ချိန် ၂၀၂၀ ခုနှစ် မတိုင်ခင်ကတည်းက ရိုက်ကူးထားတဲ့ ရုပ်ရှင်ဇာတ်ကားကြီးဖြစ်တယ်လို့ သိရပါတယ်။လက်ရှိမှာတော့ ရုပ်ရှင်မင်းသားကျော်သူဟာ နစကတာဝန်ယူပြီးချိန်ကတည်းက ပြည်ပကို ထွက်ခွာပြောင်းရွှေ့နေထိုင်နေတယ်လို့ သိရပါတယ်။