စက်တင်ဘာ ၁၄ ၊၂၀၂၅
GG(VOM)
ရန်ကုန်၊ မြောက်ဒဂုံမြို့နယ်၊ ဘေလီတံတားပေါ်ကနေ လက်ချင်းကြိုးချည်ပြီး ခုန်ချသွားတဲ့ ချစ်သူစုံတွဲ နှစ်ယောက်ရဲ့ ရုပ်အလောင်းကို ဒီနေ့ စက်တင်ဘာ ၁၄ ရက်နေ့လယ်ပိုင်းမှာ ရှာဖွေတွေ့ရှိခဲ့တယ်လို့ သိရပါတယ်။
အဲဒီစုံတွဲ နှစ်ယောက်ဟာ စက်တင်ဘာ ၁၂ ရက်နေ့တုန်းက ဘေလီတံတားပေါ်ကနေ ခုန်ချခဲ့ကြတာဖြစ်ကြောင်း ၊ ခုန်ချပြီး သုံးရက်မြောက်နေ့မှာ ရုပ်အလောင်းကိုတွေ့ရှိရတာဖြစ်တယ်လို့သိရပါတယ်။
” ခုန်ချသွားတဲ့နေ့ကတည်းက လက်တွေကိုကြိုးချည်ပြီးခုန်ချသွားကြတယ်။ အခုပြန်တွေ့တော့လည်းကြိုးချည်လျက်ပဲ။ ငမိုးရိပ်ချောင်းထဲမှာ လှေသမားတွေက အလောင်းတွေ့လို့ လှေနဲ့ ဘေလီတံတားအောက်ကို ဆွဲလာပြီးမှ အလောင်းကောက်တာပါ။ မိသားစုတွေနဲ့လည်းအဆက်အသွယ်ရပါပြီ။” လို့ မြေပြင်ကူညီရေးလုပ်ဆောင်ခဲ့တဲ့ ဝန်းရံမှူးလူမှုကူညီရေးအသင်းမှ တာဝန်ရှိသူကပြောပါတယ်။
ခုန်ချသတ်သေခဲ့တဲ့ အမျိုးသားက အသက် ၂၆ နှစ်ဖြစ်ပြီး မြောက်ဥက္ကလာကဖြစ်ကြောင်း ၊ အမျိုးသမီးကတော့ အရှေ့ဒဂုံရှိ သုခဒဂုံအိမ်ယာကဖြစ်ကြောင်းနဲ့ လက်ရှိမှာရုပ်အလောင်းတွေကိုတော့ မြောက်ဥက္ကလာဆေးရုံကို ပို့ဆောင်ထားတယ်လို့ သိရပါတယ်။
ဘာကြောင့် ယခုလိုခုန်ချသတ်သေရသလဲဆိုတာကိုတော့ မသိရှိကြောင်းနဲ့ သက်ဆိုင်ရာနယ်မြေရဲစခန်းကတော့ စုံစမ်းစစ်ဆေးနေတယ်လို့သိရပါတယ်။
စက်တင်ဘာ ၁၃ ရက်နေ့ကလည်း ငမိုးရိပ်တံတား ပေါ်ကနေ အသက် ၂၃ နှစ်အရွယ်အမျိုးသမီးတယောက်ခုန်ချမှုဖြစ်ပွားခဲ့ပြီး ရှာဖွေတွေ့ရှိခြင်းမရှိသေးပါဘူး။ စက်တင်ဘာ ၂ ရက်နေ့တုန်းက အဆိုပါ အမျိုးသမီးရဲ့ ယောကျ်ားဖြစ်သူကလည်း ငမိုးရိပ်တံတား ပေါ်ကနေပဲ ခုန်ချသတ်သေမှုဖြစ်ပွားခဲ့ပါတယ်။
ဓာတ်ပုံ – ဝန်းရံမှူး
