ဖေဖော်ဝါရီ ၁၃ – ၂၀၂၆
SS (VOM)
စစ်ကိုင်းတိုင်း၊ ဆားလင်းကြီးမြို့နယ်က PDF တပ်တွေရဲ့ စခန်းမှာ မနေ့ ဖေဖော်ဝါရီ ၁၂ ရက်၊ နေ့လယ်ပိုင်းက လေကြောင်း တိုက်ခိုက်မှု ဖြစ်ပွားခဲ့ပြီး တပ်ဖွဲ့ဝင် ၁၃ ယောက် သေဆုံးခဲ့ကာ အယောက် ၂၀ ကျော် ဒဏ်ရာ ရရှိခဲ့တယ်လို့ စစ်ရေး သတင်းရင်းမြစ်တွေက ပြောပါတယ်။
ဆားလင်းကြီးမြို့နယ် အနောက်မြောက်ခြမ်းရှိ မန်ကျီးတထောင်ရွာအနီးက PDF စခန်းမှာ မနေ့ နေ့လယ် ၁၂ နာရီခွဲဝန်းကျင်က လေကြောင်း တိုက်ခိုက်မှု ဖြစ်ပွားခဲ့တာဖြစ်ပြီး တိုက်ခိုက်ခံရချိန်က စခန်းအတွင်း အစည်းအဝေး ပြုလုပ်နေချိန် ဖြစ်တယ်လို့ သိရပါတယ်။
“အစည်းအဝေး လုပ်နေတဲ့အချိန် ဖြစ်သွားလို့ ထိခိုက်သေဆုံးမှု များသွားတာပါ။ ဂျိုင်ရိုကော်ပတာနဲ့ လေကြောင်း တိုက်ခိုက်မှု လုပ်သွားတာလို့ သိရတယ်။ ဖြစ်တဲ့အချိန် ဗုံးခိုကျင်းထဲ ရောက်ပြီးကြပေမယ့် မလွတ်ဘဲ ထိကုန်တာ” လို့ စစ်ရေး သတင်းရင်းမြစ်က ပြောပါတယ်။
အဲဒီစခန်းမှာ ဆားလင်းကြီးမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) အပြင် ယင်းမာပင်ခရိုင် ပကဖ၊ စစ်ကိုင်းတိုင်း ပကဖ နဲ့ ကချင်လွတ်လပ်ရေး တပ်မတော် (KIA) တပ်ဖွဲ့ဝင်တွေ အစည်းအဝေး ပြုလုပ်နေခဲ့တာ ဖြစ်တယ်လို့ Monywa Revolution အဖွဲ့က ထုတ်ပြန်ထားပါတယ်။
သေဆုံးသွားသူတွေဟာ ယင်းမာပင်နဲ့ ဆားလင်းကြီးမြို့နယ်မှာ စစ်ရေး လှုပ်ရှားနေတဲ့ တပ်ဖွဲ့ နှစ်ဖွဲ့က တပ်ဖွဲ့ဝင်တွေလို့လည်း သိရပါတယ်။
အစိုးရတပ်ဟာ ဆားလင်းကြီးမြို့နယ် တခုလုံးမှာ ဆားလင်းကြီးမြို့၊ ညောင်ပင်ကြီး၊ လက်ပံတောင်းတောင် စီမံကိန်းနေရာတွေမှာသာ စိုးမိုး တပ်ဆွဲထားနိုင်ပြီး ကျန်တဲ့ ကျေးရွာအားလုံးကို ဒေသတွင်း လက်နက်ကိုင် ပူးပေါင်းတပ်ဖွဲ့တွေ ထိန်းချုပ်ထားတာ ဖြစ်တယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၆ ရက်နေ့ကလည်း ပဲခူးတိုင်း နတ်တလင်းမြို့နယ် သူယာဝတီခရိုင် အမှတ် ၃၈၀၁ တပ်ရင်း၊ တပ်ခွဲ ၄ ကာကင်းစခန်းကို အစိုးရတပ်က ဒရုန်း အသုံးပြု တိုက်ခိုက်ခဲ့တာကြောင့် တပ်ဖွဲ့ဝင် ခြောက်ယောက် သေဆုံးခဲ့တယ်လို့ သိရပါတယ်။
Photo – Monywa Revolution
