ပခုက္ကူ- အောက်တိုဘာ ၂၁-၂၀၂၆
MP(VOM)
မကွေးတိုင်း၊ ပခုက္ကူမြို့၊ စက်မှုဇုံ (၆) လမ်းက “တိုးတိုးရှိန်” စတိုးဆိုင်ကို အောက်တိုဘာလ ၂၀ ရက် မွန်းလွဲ ၂ နာရီကျော်အချိန်က လက်နက်ကိုင်လူတစုကနေ ဓားပြတိုက်ပြန်ပေးဆွဲမူ ဖြစ်သွားတယ်လို့ သိရပါတယ်။
” အင်္ကျီအနက်ရောင်တွေ ဝတ်ဆင်ထားပြီး သေနတ်အရှည်နဲ့ပစ္စတို သေနတ်ကိုင်ဆောင်ထားကြတဲ့ အသက်၂၀နှစ်ခန့် အမည်မသိ လက်နက်ကိုင် (၅) ဦးက ဆိုင်ကယ်နှစ်စီးနဲ့
ရောက်လာတယ် ဆိုင်ထဲကို လူငယ်သုံးဦးပဲ ဝင်တယ်။ အဲဒီနောက် ကလေးငယ်ချီထားတဲ့ဆိုင်ရှင်အမျိုးသမီးကို ဖမ်းဆီးခေါ်ဆောင်ဖို့ကြိုးပမ်းတာ ရုန်းရင်းဆန်ခတ်ဖြစ်ပြီး မအောင်မြင်လို့ Kpay နဲ့ Wave pay အသုံးပြုတဲ့လက်ကိုင်ဖုန်းတလုံးယူဆောင်သွားတယ်” လို့ ဖြစ်စဉ်ကိုသိသူက ပြောပါတယ်။
ရုန်းရင်းဆန်ခတ်ဖြစ်စဥ်ကြောင့် ကလေးငယ်မှာ ညာခြေထောက်တွေ ပြတ်ရှဒဏ်ရာရခဲ့ပြီး မိခင်သူဖြစ်သူက လက်တွေမှာ ပြတ်ရှဒဏ်ရာတွေ ရရှိသွားခဲ့တယ်လို့သိရပါတယ်။
အခုဖြစ်စဉ်က (၃) ကြိမ်မြောက် တိုက်ခိုက်ခံရတာပါ။ ပထမအကြိမ်အနေနဲ့ (ကား) တစီး၊ လက်ကိုင်ဖုန်း (၅) လုံး၊ ဆိုင်ရောင်းရငွေတွေ ပါသွားတဲ့အပြင် ဆိုင်တွင်းပစ္စည်းတွေ ဖျက်ဆီးခံခဲ့ရပြီး မောင်ဖြစ်သူမှာလည်း သေနတ်နဲ့ ပစ်ခတ်ခံခဲ့ရပါတယ်။
ဒုတိယအကြိမ်အနေနဲ့ အမေဖြစ်သူ လူပြန်ပေးဆွဲခံခဲ့ရပြီး ငွေကျပ် သိန်း ၅၀၀ ထိ ပေးဆောင်ကာ ပြန်လည်ရွေးနှုတ်ခဲ့ရပါတယ်။
အခု တတိယအကြိမ်မြောက်မှာတော့ လက်နက်ကိုင် ၅ ဦးက ဝင်ရောက်လာပြီးလက်ကိုင်းဖုန်းကို ထပ်မံလုယက်သွားတယ်လိုသိရပါတယ်။
အောက်တိုဘာလ ၅ရက် ည၇နာရီကျော်က မြို့ရှောင်လမ်းရှိ မိတ်ဆွေ အိမ်ဆောက်ပစ္စည်းကို အမည်မသိလူငယ်တစ်စု ရောက်ရှိလာပြီးဧည့်စာရင်းစစ်မယ်ဆိုကာ Kpay password မေးပြီး ဖုန်းနှစ်လုံးနဲ့ ကေပေသိန်း၂၀ယူသွားတယ်လို့သိရပါတယ်။
ပခုက္ကူမြို့မှာ ဩဂုတ်လ ၂၈ ရက် မနက်ပိုင်းကပခုက္ကူမြို့အရှေ့ဘက်မှာရှိတဲ့ အမှတ် (၅) အထည်စက်ရုံဝန်ထမ်းတွေအတွက် ထုတ်ယူလာတဲ့ လစာငွေကျပ် သိန်း ၁,၄၁၀ နဲ့ ဝန်ထမ်းတချို့ကို လက်နက်ကိုင်အဖွဲ့တဖွဲ့က စက်ရုံရှေ့မှာဘဲ တားဆီး ဓါးပြတိုက် ဖမ်းခေါ်သွားတဲ့ ဖြစ်စဉ်တခု ဖြစ်ခဲ့ပါသေးတယ်။
ဩဂုတ်လ၁၅ရက် နေ့ခင်းကလည်း အမှတ်(၃)ရပ်ကွက် (၁)လမ်း ကုန်စုံဆိုင်ကို အမည်မသိလက်နက်ကိုင်အုပ်စုက ဖုန်းတလုံးနဲ့ ငွေသား၆သိန်းကျော် ဓါးပြတိုက်သွားတယ်လို့ သိရပါတယ်။
မတ်လ ၂၆ ရက် နေ့လယ်ပိုင်းကလည်း မြို့မလမ်းပေါ် မျက်မမြင်ကျောင်းအနီးက စက်သုံးဆီအရောင်းဆိုင်မှာ လက်နက်ကိုင်ဆောင်ထားတဲ့ လူတစုက နေ့ခင်းကြောင်တောင်ဓါးပြတိုက်ပြီး ဖုန်းနဲ့ ငွေတွေယူသွားတယ်လို့သိရပါတယ်။
ဖေဖော်ဝါရီလပိုင်းတုန်းကတော့ ပခုက္ကူမြို့၊ အမှတ်၃ရပ်ကွက်၊ ထင်တန်းလမ်းမပေါ်က ဆန်ဆိုင်ကို ဆိုင်ကယ်နှစ်စီးနဲ့ အမည်မသိ လက်နက်ကိုင်ဆောင်ထားသူ အမျိုးသား၅ ဦး ရောက်လာပြီး ဆိုင်ရှင်အမျိုးသမီးကို ဖမ်းဆီးခေါ်ဆောင်ပြန်ပေးဆွဲဖို့ ကြိုးပမ်းတာမှာ မအောင်မြင်လို့ ဆိုင်အတွင်းမှာရှိတဲ့ လက်ကိုင်ဖုန်း ၃ လုံး နဲ့ ငွေသားအချို့ကို လုယက်ယူဆောင်ကာ ထွက်ပြေးသွားတာ ဖြစ်ခဲ့ပါသေးတယ်။
၂၀၂၁ နိုင်ငံရေးအပြောင်းအလဲဖြစ်ပြီး လက်နက်ကိုင်သူ အများအပြားပေါ်လာပြီးနောက် ပခုက္ကူဝန်းကျင်ဟာ နယ်မြေမတည်ငြိမ်မှု အခွင့်ယူပြီး ပြန်ပေးဆွဲတာ၊ လူသတ်တာ၊ ဓါးပြတိုက် အနုကြမ်းစီးတာတွေကြောင့် ငွေကြေးချမ်းသာသူတချို့ဟာ မြို့ကြီးတွေကို ပြောင်းရွှေနေကြတယ်လို့ သိရပါတယ်။
