မန္တလေး၊ ဩဂုတ် ၇-၂၀၂၁
HlK (VOM)
မန္တလေးတိုင်း ဝန်ကြီးချုပ်ဟောင်း ဒေါက်တာဇော်မြင့်မောင်ဟာ အိုးဘိုအကျဉ်းထောင်အတွင်း ကင်ဆာရောဂါနဲ့ ဆေးကုသနေရာ ရောဂါမသက်သာတာကြောင့် မနေ့ ဩဂုတ်လ ၆ရက်နေ့ ည၈နာရီခန့်က မန္တလေးအထွေထွေရောဂါကုဆေးရုံကြီးကို ပြောင်းရွှေ့ကုသနေရတယ်လို့ နီးစပ်သူ အသိုင်းအဝိုင်းကနေ သိရပါတယ်။
ရဲတပ်ဖွဲ့အသိုင်းအဝိုင်းကို ဆက်သွယ်ရာမှာတော့ ” ဇူလှိုင်လ၂၉ ရက်နေ့ကတည်းက သွေးကင်ဆာရောဂါနဲ့ အကျဉ်းထောင်ဆေးရုံမှာ ဆေးကုနေရတာ၊ မသက်သာလို့ အခုလို့ စီစဉ်လိုက်တာဖြစ်တယ်”လို့ ပြောပါတယ်။
မန္တလေးဆေးရုံကြီးအနီး နေထိုက်သူတစ်ဦးကလည်း “မနေ့ညကတော့ ယာဉ်တန်းတွေနဲ့ ဆေးရုံထဲဝင်သွားတာတွေ့တယ်၊ ဘယ်သူလာတာလည်းတော့ မသိဘူး၊ မနေ့ကလည်း လိုင်းပေါ်မှာ ဒေါက်ဇော် ဆေးလာကုမယ်လို့တော့ ဖတ်လိုက်ရတယ်”လို့ ပြောပါတယ်။
ဒေါက်တာဇော်မြင့်မောင်ဟာ ယခင်ကတည်းက ကင်ဆာဆေးပုံမှန်သွင်းနေရသူ ဖြစ်ပြီး အကျဉ်းထောင်ကျတဲ့အချိန် ဆေးကုသမှုခံယူနေရတာကလည်း ရောဂါအခြေအနေ သက်သာလာမှုမရှိတာကြောင့် မန္တလေးဆေးရုံကြီးက ပါမောက္ခဌာနမှူးတစ်ဦးရဲ့ ဆေးမှတ်ချက်အရ အခုလို ပြောင်းရွှေ့ကုသလိုက်ရတာ ဖြစ်တယ်လို့ သိရပါတယ်။
ဒေါက်တာဇော်မြင့်မောင်ရဲ့ အဖေဖြစ်သူဟာလည်း မန္တလေးဆေးရုံကြီး အရေးပေါ်အထူးကြပ်မတ်ကုဆောင်မှာ ဆေးကုသမှုခံယူနေရတယ်လို့ မိသားစုနဲ့နီးစပ်တဲ့ အသိုင်းအဝိုင်းကနေ သိရပါတယ်။
#voiceofmyanmar #VOM #မန္တလေး
