Day: January 18, 2023

ကိဗ်ယက်၊ ဇန်နဝါရီ-၁၈-၂၀၂၃ မျိုးဆက်(VOM) ယူကရိန်းနိုင်ငံ မြို့တော်ကိဗ်ယက်အရှေ့ဘက် ဆင်ခြေဖုံးရှိ မူကြိုကျောင်းအနီးမှာ ရဟတ်ယာဉ်တစင်း ပျက်ကျမှုဖြစ်ပွားခဲ့ရာ ယူကရိန်းပြည်ထဲရေး၀န်ကြီးအပါအ၀င် လူ ၁၆ ဦးသေဆုံးသွားပါတယ်။ ပြည်ထဲရေး၀န်ကြီး ဒန်နီစ်မိုနာစကီဟာ အခြားသူရှစ်ဦးနဲ့အတူ ရဟတ်ယာဉ်ပေါ်မှ လိုက်ပါခဲ့တာဖြစ်ပြီး သေဆုံးသူတွေထဲမှာ ကလေးငယ်နှစ်ဦးလည်းပါ၀င်တယ်လို့ တာ၀န်ရှိသူတွေက ပြောပါတယ်။ ရဟတ်ယာဉ်ဟာ ဘရိုဘာရီဒေသ ဆင်ခြေဖုံးမှာဆင်းသက်စဉ်မှာ ပျက်ကျခဲ့တာဖြစ်ပြီး ပြည်ထဲရေး၀န်ကြီးဌာန လက်ထောက်၀န်ကြီးနဲ့ပြည်နယ်အတွင်း၀န်လည်း သေဆုံးခဲ့တယ်လို့ ပြောပါတယ်။ ရဟတ်ယာဉ်ပျက်ကျမှုဖြစ်ပွားခဲ့တဲ့ မူကြိုကျောင်းအနီးမှာ မီးလောင်မှုဖြစ်ပွားခဲ့ပြီး ကလေးငယ်တွေနဲ့ ၀န်ထမ်းတွေကို ဘေးလွတ်ရာကို ရွှေ့ပြောင်းပေးခဲ့ရပါတယ်။ လက်ရှိမှာတော့ ကလေးငယ် ၁၀ ဦးအပါအ၀င် လူ ၂၂ ဦးကို ဆေးရုံတင်ထားရကြောင်း တာ၀န်ရှိသူတွေက ပြောပါတယ်။ ရဟတ်ယာဉ်ပျက်ကျချိန်မှာ မြူတွေထူထပ်စွာကျနေတာကြောင့် မြင်ကွင်းမရှင်းဖြစ်နေပြီး ကနဦးအစီရင်ခံစာတွေအရ ရဟတ်ယာဉ်ဟာ မူကြိုကျောင်းနဲ့တိုက်မိပြီးနောက် လူနေအဆောက်အအုံတခုနဲ့ နီးကပ်စွာပျံသန်းခဲ့တယ်လို့ သိရပါတယ်။ Ref: BBC #voiceofmyanmar #VOM…

မနီလာ၊ ဇန်နဝါရီ-၁၈-၂၀၂၃ မျိုးဆက်(VOM) အခွန်တိမ်းရှောင်မှုနဲ့ စွဲချက်တင်ခံထားရတဲ့ နိုဘယ်ဆုရရှင် ဖိလစ်ပိုင်သတင်းထောက် မာရီယာရက်စ်ဆာကို ဖိလစ်ပိုင်တရားရုံးက ဇန်နဝါရီ ၁၈ ရက်မှာ တရားသေလွတ်ပေးလိုက်ပါတယ်။ မာရီယာရက်စ်ဆာဟာ ပြစ်မှုထင်ရှားပါက ထောင်ဒဏ် ၃၄ နှစ်ထိ ကျခံရနိုင်ပြီး ဒီနေ့ဟာ အမှန်တရားနဲ့ တရားမျှတမှုက အနိုင်ရရှိခဲ့ကြောင်း တရားရုံးကအမိန့်ချပြီးနောက် သူကပြောပါတယ်။ သူ့ရဲ့အမှုဟာ ၂၀၁၈ ခုနှစ်မှာ စတင်ခဲ့ခြင်းဖြစ်ပြီး ရက်ပ်လာသတင်းဌာနကို တည်ထောင်သူ မစ္စရက်စ်ဆာကို ဖိလစ်ပိုင်အစိုးရက အမှုဖွင့်ခဲ့တာဖြစ်ပါတယ်။ နိုင်ငံခြားရင်းနှီးမြုပ်နှံသူတွေနဲ့ ပူးပေါင်းကာ ရင်းနှီးမြုပ်နှံငွေတိုးလာတဲ့အခါ မစ္စရက်စ်ဆာနဲ့ ရက်ပ်လာသတင်းဌာနတို့ဟာ အခွန်ရှောင်တိမ်းရန် ကြိုးပမ်းခဲ့တယ်ဆိုပြီး သမ္မတဟောင်း ဒူတာတေးလက်ထက်မှာ တရားစွဲခဲ့ပါတယ်။ ဖိလစ်ပိုင်တာ၀န်ရှိသူတွေက၂၀၂၂ ခုနှစ်မှာ ရက်ပ်လာသတင်းဌာနကိုပါ ပိတ်ပစ်ဖို့ အမိန့်ထုတ်ခဲ့ပေမယ့် သတင်းဌာနကို ပိတ်မှာမဟုတ်ကြောင်း မစ္စရက်စ်ဆာက တုံ့ပြန်ခဲ့ပြီး ဥပဒေကြောင်းအရ ဆက်လက်ရင်ဆိုင်ခဲ့ပါတယ်။ Ref: BBC #voiceofmyanmar #VOM #မနီလာ

ဟနွိုင်း၊ ဇန်နဝါရီ-၁၈-၂၀၂၃ မျိုးဆက်(VOM) ဗီယက်နမ်သမ္မတ ငုယင်ဆွမ်ဖူဟာ ဇန်နဝါရီ ၁၇ ရက်မှာ ရာထူးကနေ နှုတ်ထွက်လိုက်ပြီး သူ့ရဲ့နှုတ်ထွက်မှုကို ဗီယက်နမ်အာဏာရ ကွန်မြူနစ်ပါတီ ဗဟိုကော်မတီက အတည်ပြုလိုက်ပါတယ်။ သမ္မတ ငုယင်ဆွမ်ဖူဟာ ကိုဗစ်-၁၉ ကပ်ရောဂါ တုံ့ပြန်မှုနဲ့ဆက်စပ်ပြီး အကျင့်ပျက်ချစားမှု အရှုပ်တော်ပုံမှာ ပါ၀င်နေတယ်လို့ ကျယ်ကျယ်ပြန့်ပြန့် စွပ်စွဲခံထားရသူဖြစ်ပါတယ်။ သမ္မတအဖြစ်မှနှုတ်ထွက်ဖို့နဲ့ ပါတီရဲ့ပေါ်လစ်ဗျူရိုမှာ တာ၀န်ယူထားတဲ့အပိုင်းကနေ နှုတ်ထွက်ဖို့ သူ့ရဲ့ဆုံးဖြတ်ချက်ကို ပါတီဗဟိုကော်မတီက ဇန်နဝါရီ ၁၇ ရက်မှာ ခွင့်ပြုလိုက်တာဖြစ်ပါတယ်။ ဒုတိယ၀န်ကြီးချုပ်နှစ်ဦးအပါအ၀င် တာ၀န်ရှိသူအများအပြားရဲ့ အရှုပ်တော်ပုံတွေနဲ့ အမှားအယွင်းတွေအတွက် သူဟာ နိုင်ငံရေးအရ တာ၀န်ယူ တာ၀န်ခံရမှာဖြစ်ကြောင်း ဗီယက်နမ်ကွန်မြူနစ်ပါတီက ပြောပါတယ်။ ကွန်မြူနစ်ပါတီခေါင်းဆောင် ငုယင်ဖူထရပ်ဟာ အစိုးရထိပ်တန်းအရာရှိတွေရဲ့ အကျင့်ပျက်ချစားမှုတွေကို တိုက်ဖျက်နှိမ်နှင်းလျှက်ရှိပါတယ်။ ကိုဗစ်-၁၉ တုံ့ပြန်ရေးနဲ့ပတ်သက်ပြီး အကျင့်ပျက်ချစားမှုအရှုပ်တော်ပုံကြောင့် ယခုလအစောပိုင်းကလည်း ဒုတိယ၀န်ကြီးချုပ်နှစ်ဦးကို ထုတ်ပယ်ခဲ့ပါတယ်။ Ref: NHK Photo:Reuters #voiceofmyanmar…