အောက်တိုဘာ ၇၊ ၂၀၂၂
VOM (GG)
မကွေး တိုင်း ၊ ကံမမြို့၊ကံမ-ပြကြီးကားလမ်းပေါ်က Express ကားပေါ်ကနေ နိုင်ငံသားအထောက်အထားမဲ့သူ ၁၈ ယောက်ကို မနေ့
အောက်တိုဘာလ ၆ ရက်နေ့က ဖမ်းဆီးရမိခဲ့တယ်လို့ သိရပါတယ်။
နိုင်ငံသားအထောက်အထားမဲ့သူတွေကို ကံမ-ပြကြီးကားလမ်းမိုင်တိုင် ၁၂/၃ နဲ့ ၁၂/၄ မှာရပ်ထားတဲ့ Ak Ar Kar အဝေးပြေးကား ကားကို စစ်ဆေးရာကနေ ဖမ်းဆီးရမိ ခဲ့တာဖြစ်ပြီး ယာဥ်မောင်းနဲ့ ယာဥ်နောက်လိုက်ကတော့ ထွက်ပြေးသွားတယ်လို့သိရပါတယ်။
” ကားကရပ်ထားတာ ၊ကားသမားတွေ မတွေ့ရဘူး၊ လုံခြုံရေးအဖွဲ့တွေက ကားပေါ်တက်စစ်တော့ နိုင်ငံသားအထောက်ထားမဲ့သူတွေကို တွေ့ရတာ ၊ ဒီနေ့ မွန်းတည့် ၁၂ နာရီလောက်ကမိတာ၊ ပျဉ်ထောင်ရွာနားမှာပါ၊ ခေါ်လာတဲ့ယာဥ်မောင်းတွေမမိတော့ အခြေအနေအသေးစိတ်က သေချာမသိရသေးဘူး ” လို့ ဒေသခံ ပရဟိတသမား တဦးက ပြောပါတယ်။
ဖမ်းမိတဲ့ နိုင်ငံသားအထောက်အထားမဲ့သူ ၁၈ ယောက်ထဲမှာ မိန်းကလေးက ၃ ယောက်၊ယောကျ်ားလေးက ၁၅ ယောက်ဖြစ်ကြောင်း၊ လက်ရှိမှာ အားလုံးကို ကြို့ပင်ရဲစခန်းမှာ ထိန်းသိမ်းကာ စစ်ဆေးမှုတွေ လုပ်နေတယ်လို့သိရပါတယ်။
ပြီးခဲ့တဲ့ စက်တင်ဘာလ ၁၉ ရက်နေ့တုန်းကလည်း ကံမကနေ ပြည်ကိုမောင်းလာတဲ့ ပုလင်းခွံတွေသယ်လာတဲ့ ကားပေါ်ကနေ နိုင်ငံသားအထောက်ထားမဲ့ သူ ၃၇ ယောက်ကို ပြည်မြို့ နဝဒေးတံတားစစ်ဆေးရေးဂိတ်မှာ ဖမ်းဆီးရမိခဲ့တယ်လို့ သိရပါတယ်။
ပြီးခဲ့တဲ ဇွန်လနဲ့ ဇူလိုင်လတုန်းကလည်း ပဲခူးတိုင်း၊ ပြည်ခရိုင်၊ ပန်းတောင်းမြို့နဲ့ ဥသျှစ်ပင်မြို့မှာ နိုင်ငံသားအထောက်ထားမဲ့သူ ၃၅ ယောက် ဖမ်းဆီးရမိခဲ့ပါတယ်။
#voiceofmyanmar #VOM #အထောက်ထားမဲ့ခရီးသွားသူတွေဖမ်းမိ #ကံမ
