Day: December 8, 2023

  ယဲ့ရီဗန်၊ ဒီဇင်ဘာ-၈-၂၀၂၃ မျိုးဆက်(VOM) အာမေးနီးယားနဲ့ အဇာဘိုင်ဂျန်နိုင်ငံတို့ဟာ နှစ်နိုင်ငံဆက်ဆံရေးပုံမှန်ပြန်ဖြစ်စေဖို့ လုပ်ဆောင်သွားမှာဖြစ်ပြီး နာဂေါ်နို- ခါရာဘတ် တိုက်ပွဲအတွင်း ဖမ်းဆီးထားတဲ့ အကျဉ်းသားတွေကိုလည်း လဲလှယ်သွားမှာဖြစ်တယ်လို့ တာဝန်ရှိသူတွေက ပြောပါတယ်။ အိမ်နီးချင်းနှစ်နိုင်ငံအကြားအငြင်းပွားဖွယ်နယ်မြေနဲ့ ပတ်သက်ပြီး ဆယ်စုနှစ်များစွာပဋိပက္ခများဖြစ်ပွားနေခဲ့ပါတယ်။ နှစ်နိုင်ငံစလုံးစောင့်မျှော်ခဲ့ရတဲ့ ငြိမ်းချမ်းရေးအတွက် သမိုင်းဝင် အခွင့်အရေးတွေကို မြင်တွေ့ခဲ့ရတယ်လို့ ပူးတွဲထုတ်ပြန်ချက်မှာ ဖော်ပြထားပါတယ်။ နှစ်နိုင်ငံစလုံးအနေနဲ့ ငြိမ်းချမ်းရေးသဘောတူစာချုပ်ကိုယခုနှစ်ကုန်မှာ လက်မှတ်ရေးထိုးဖို့ မျှော်လင့်ထားကြောင်း တာဝန်ရှိသူတွေကဆိုပါတယ်။ ဒီကိစ္စအပေါ် ကြိုဆိုကြောင်းဥရောပကောင်စီဥက္ကဌ ချားလက်စ်မီရှဲကထုတ်ပြန်ထားပြီး အာမေးနီးယား-အဇာဘိုင်ဂျန်ဆက်ဆံရေးမှာ ကြီးမားတဲ့ အောင်မြင်မူလို့ဆိုပါတယ်။ နယ်မြေစိုးမိုးရေးအပေါ် အပြန်အလှန်လေးစားမှုကိုအခြေခံပြီး အပြည့်အဝငြိမ်းချမ်းရေး သဘောတူစာချုပ်ကို လက်မှတ်ရေးထိုးနိုင်ရေး လုပ်ဆောင်သွားမယ်လို့ အာမေးနီးယားနဲ့ အဇာဘိုင်ဂျန်တာဝန်ရှိသူတွေက ပြောပါတယ်။ ဒီသဘောတူညီချက်မှာ အီးယူ၊ ရုရှား၊ အမေရိကန်တို့ရဲ့ ကြားဝင်စေ့စပ်မှုနဲ့အတူ အာမေးနီးယားနဲ့ အဇာဘိုင်ဂျန်အစိုးရတို့အကြား အကြိမ်ပေါင်းများစွာတွေ့ဆုံဆွေးနွေးပြီးနောက် ရရှိခဲ့တာဖြစ်ပါတယ်။ Ref:BBC Photo:Getty Images  

  မော်စကို၊ ဒီဇင်ဘာ-၈-၂၀၂၃ မျိုးဆက်(VOM) ရုရှားသမ္မတရွေးကောက်ပွဲကို လာမယ့်နှစ်မတ်လ ၁၇ ရက်မှာကျင်းပသွားမှာဖြစ်ကြောင်း ရွေးကောက်ပွဲကော်မရှင် တာဝန်ရှိသူတွေက အတည်ပြုပြောဆိုလိုက်ပါတယ်။ ရွေးကောက်ပွဲကျင်းပမယ့် အချိန်ကို ကြေညာပြီးနောက်မှာ လက်ရှိသမ္မတပူတင်ဟာ သူ့ရဲ့ ပဉ္စမမြောက်သက်တမ်းအတွက် သမ္မတလောင်းအဖြစ် မကြာခင်ကြေညာမယ်လို့ ထင်ကြေးပေးမှုတွေလည်း ထွက်ပေါ်နေပါတယ်။ ရွေးကောက်ပွဲမှာ ရုရှားသိမ်းပိုက်ထားတဲ့ ယူကရိန်းနယ်မြေတွေမှာ ရွေးကောက်ပွဲကျင်းပခြင်းပြုမပြုကိုလည်း ရွေးကောက်ပွဲကော်မရှင်က ဆုံးဖြတ်သွားမှာဖြစ်ပါတယ်။ သမ္မတပူတင် ရွေးကောက်ပွဲဝင်မဝင် ရှင်းလင်းစွာမသိရသေးပေမယ့် ရွေးကောက်ပွဲကျင်းပမယ့် နေ့ရက်အချိန်သိရှိပြီးရင် သူ့ရဲ့ အစီအစဉ်တွေနဲ့ပတ်သက်ပြီး ကြေညာသွားမယ်လို့ ပူတင်က ပြောဆိုထားပါတယ်။ သူ့ရဲ့ နှစ်ပတ်လည်သတင်းစာရှင်းလင်းပွဲကို ဒီဇင်ဘာ ၁၄ ရက်မှာ ကျင်းပဖို့ ပူတင်က စီစဉ်ထားပြီး ပူတင်အစိုးရကို ထောက်ခံတဲ့ အာဏာရ ယူနိုက်တက်ရုရှားပါတီရဲ့အစည်းအဝေးကိုတော့ ဒီဇင်ဘာ ၁၇ ရက် ပြုလုပ်ဖို့ စီစဉ်ထားပါတယ်။ Ref: NHK Photo:AP  

Voice of Myanmar ကမ္ဘာပတ်လမ်းကြောင်းအတွင်းသို့ ပထမဆုံးသွားရောက်ခဲ့ပြီး အမျိုးသားသူရဲကောင်းအဖြစ် အသိအမှတ်ပြုခံခဲ့ရသူ အမေရိကန်အာကာသယာဉ်မှူးနှင့် နိုင်ငံရေးသမား ဂျွန်ဂလန်းသည် အသက် ၉၅ နှစ်အရွယ် ၂၀၁၆ ခုနှစ် ဒီဇင်ဘာ ၈ ရက်တွင် ကွယ်လွန်ခဲ့သည်။