ဒီဇင်ဘာ ၁၁ – ၂၀၂၃
SN (VOM)
(Facebook က ဖြုတ်ချတာကြောင့် ပြန်တင်ပေးခြင်းဖြစ်ပါသည်)
အခုတပတ် ရွှေဈေးနဲ့ ငွေလဲဈေးမှာ ဈေးမာပြီး တက်ရိပ်ပြခဲ့ပါတယ်။ ဓာတ်ဆီဈေးမှာ ဈေးကွက်အတွင်း ဆီပြတ်လပ်မှုကြောင့် ဈေးတန်းအမြင့်မှာပဲ ဆက်ရှိနေပါတယ်။
နိုင်ငံခြားငွေ အရောင်းအဝယ်ပြုလုပ်ရာမှာ ဈေးကွက်ပေါက်ဈေးအတိုင်း ရောင်းချခွင့်ပြုလိုက်တဲ့ ဗဟိုဘဏ်ရဲ့ ဒီဇင်ဘာ ၅ ရက်နေ့ ထုတ်ပြန်ချက်ကြောင့် နိုင်ငံခြားငွေဈေးတွေ အလှုပ်အခတ်များခဲ့သလို ပြည်တွင်းရွှေဈေးဟာလည်း အတက်အကျမငြိမ်မှုတွေရှိခဲ့တာပါ။
ဒါ့ကြောင့် ပြည်တွင်းက ရွှေ၊ ငွေနဲ့ စက်သုံးဆီတို့ရဲ့ လာမယ့်တပတ်အတွင်း ဖြစ်ပေါ်လာနိုင်မယ့် ဈေးကွက်အခြေအနေတွေကို ခန့်မှန်း တွက်ဆနိုင်ဖို့အတွက် ဒီဇင်ဘာ ၅ ရက်ကနေ ၁၁ ရက်အထိ ဖြစ်ပေါ်ခဲ့တဲ့ ဈေးကွက်အခြေအနေတွေကို VOM ကနေ စုစည်း ဖော်ပြပေးလိုက်ပါတယ်။
အခုတပတ် ပြည်တွင်းရွှေဈေးမှာ ကမ္ဘာ့ရွှေဈေး အဆမတန် မြင့်တက်လာမှုကြောင့် ရုတ်တရက် ထိုးတက်သွားပြီး လက်ရှိအချိန်အထိ ဈေးတန်းအမြင့်မှာ ရှိနေပါတယ်။
ကမ္ဘာ့ရွှေဈေး မြင့်တက်မှုကြောင့် လိုက်ပါ မြင့်တက်ခဲ့တဲ့ ပြည်တွင်းရွှေဈေးဟာ ဒီဇင်ဘာ ၂ ရက်၊ နေ့လယ်ပိုင်းမှစတင်ကာ ကျပ် ၃၇ သိန်းကျော်ကို ရောက်ရှိလာတာဖြစ်ပြီး ဒီဇင်ဘာ ၅ ရက်ကနေ ၁၁ ရက်အထိ တပတ်အတွင်းမှာတော့ အမြင့်ဆုံးဈေး ကျပ် သုံးဆယ့်ခုနစ်သိန်းခုနစ်သောင်းအထိ ရောက်ရှိခဲ့ပါတယ်။
အဲ့ဒီ့နောက် တဖြည်းဖြည်း ပြန်လည် ကျဆင်းလာပြီး ဒီဇင်ဘာ ၉ ရက်မှ စတင်ကာ လက်ရှိအချိန်အထိ ကျပ် ၃၇ သိန်းဝန်းကျင်မှာပဲ အတက်အကျ ဖြစ်ပေါ်နေပါတယ်။
ကမ္ဘာ့ရွှေဈေးကတော့ နိုဝင်ဘာ ၂၅ ရက်နေ့မှစတင်ကာ တအောင်စ ဒေါ်လာ ၂၀၀၀ အထက်နဲ့ တောက်လျှောက် မြင့်တက်လာခဲ့တာဖြစ်ပြီး ပြီးခဲ့တဲ့တပတ်အတွင်း အမြင့်ဆုံး တအောင်စ ၂၀၈၈ ဒေါ်လာကို ရောက်ရှိခဲ့ပေမယ့် အခုတပတ်မှာတော့ တဖြည်းဖြည်း ပြန်လည် ကျဆင်းခဲ့ကာ ဒီကနေ့ ဒီဇင်ဘာ ၁၁ ရက် နေ့လယ်မှာ တအောင်စ ၁၉၉၆ ဒေါ်လာဈေး ဖြစ်ပေါ်နေပါတယ်။
ဒါ့အပြင် ရန်ကုန်တိုင်းရွှေအသင်း (YGEA) ရဲ့ ဈေးကွက်ဈေးနှုန်းဟာလည်း ဒီဇင်ဘာ ၈ ရက်နေ့မှစတင်ကာ တကျပ်သား ၃၅ သိန်းကျော်အထိ မြင့်တက်လာပါတယ်။
ဗဟိုဘဏ်အနေနဲ့ နိုင်ငံခြားငွေလဲနှုန်း သတ်မှတ်ချက်ကို ဈေးကွက်ပေါက်ဈေးအတိုင်း ရောင်းဝယ်ခွင့်ပြုလိုက်ပြီးနောက် ပြည်တွင်းဒေါ်လာလဲနှုန်းတွေ မြင့်တက်လာခဲ့ပြီး YGEA ရွှေဈေးပါ လိုက်ပါ မြင့်တက်လာခဲ့တာ ဖြစ်ပါတယ်။
YGEA အနေနဲ့ ဈေးကွက်ဈေးနှုန်းကို ဘဏ်တွေအကြား ဗဟိုဘဏ်ရဲ့ အွန်လိုင်းဈေးကွက်ကနေ အရောင်းအဝယ်ဖြစ်တဲ့ ဒေါ်လာပေါက်ဈေးနဲ့ တွက်ချက်ပြီး ဈေးကွက်ပေါက်ဈေးအဖြစ် ပြီးခဲ့တဲ့ အောက်တိုဘာ ၁၂ ရက်ကစပြီး ပြောင်းလဲ ထုတ်ပြန်နေတာပါ။
“ရွှေရည်ညွှန်းဈေးက ပြည်တွင်းဘဏ်တွေရဲ့ အရောင်းအဝယ်ဖြစ်တဲ့ဈေးနဲ့ပဲ တင်ထားတာ။ ဒေါ်လာဈေးတက်လာလို့ ရည်ညွှန်းဈေး ၃၅ သိန်းကျော်သွားတာပါ။ ကမ္ဘာ့ဈေးက ကျပါတယ်၊ ပြည်တွင်း ဒေါ်လာဈေးတက်လာတာ။ လက်ရှိ ရွှေဈေးကွက် အနေအထားကတော့ ဘယ်လိုမှကို ပြောလို့မရဘူးဖြစ်နေတယ်။ ကမ္ဘာ့ရွှေဈေးကလည်း တခါမှ နှစ်ထောင်မကျော်ဖူးဘူး။ အစ္စရေး စစ်ဖြစ်တာနဲ့ တောက်လျှောက်တက်သွားတာ။ ၁၆၀၀ ၊ ၁၇၀၀ ကနေတက်သွားပြီး ပြန်မကျတော့ဘူး။ ပြည်တွင်းမှာလည်း တခုပြီးတခု ကောလဟာလနဲ့ ဒေါ်လာဈေးက ကစားနေတဲ့အခါကျတော့ ဒေါ်လာဈေးမကျတာလည်း ပါတာပေါ့။ ရွှေဈေးက လုံးဝကို မှန်းလို့မရတော့ဘူး၊ အရင်လို ပုံသေမဟုတ်တော့ဘူး” လို့ YGEA ဥက္ကဋ္ဌ ဦးမျိုးမြင့်က ပြောပါတယ်။
ဗဟိုဘဏ်ရဲ့ Online Trading ကနေ အရောင်းအဝယ်လုပ်နေခဲ့တဲ့ အမေရိကန်ဒေါ်လာဈေးနှုန်းကို ဒီဇင်ဘာ ၈ ရက်မှစတင်ကာ တဒေါ်လာကို ၃၂၉၀ ကျပ် ပြောင်းလဲသတ်မှတ်လိုက်တာကြောင့် YGEA ရဲ့ ရွှေရည်ညွှန်းဈေး မြင့်တက်သွားတာဖြစ်ပြီး အရင်က ဗဟိုဘဏ် ဒေါ်လာပေါက်ဈေးဟာ ကနဦးမှာ ၂၉၃၂ ကျပ်၊ အဲ့ဒီ့ နောက်မှာတော့ ၂၉၆၀ ကျပ် ရှိခဲ့တယ်လို့ သိရပါတယ်။
ဒီဇင်ဘာ ၈ ရက်က ထုတ်ပြန်တဲ့ YGEA ရွှေဈေးဟာ အကယ်ဒမီ မီးလင်းရွှေ တကျပ်သားကို သုံးဆယ့်ငါးသိန်း ခြောက်သောင်းခုနစ်ထောင့်နှစ်ရာကျပ် ဖြစ်ပြီး အမျိုးသားနေ့ဈေးကွက်မပိတ်ခင် ဒီဇင်ဘာ ၆ ရက်ကဈေးနဲ့ယှဉ်ရင် ကျပ် သုံးသိန်းခွဲကျော် ခုန်တက်လာတာဖြစ်ပါတယ်။
ရွှေဈေးတွေ မြင့်တက်လာပေမယ့် ဈေးကွက်မှာတော့ ရွှေဝယ်ယူတဲ့သူ နည်းနေပြီး ပြန်ရောင်းချင်ရင်လည်း ဈေးကွက် ပြန်ငြိမ်သွားမှ အရောင်းအဝယ် လုပ်ကြတယ်လို့ သိရပါတယ်။
ပြည်တွင်း ငွေလဲဈေးတွေဟာ ဗဟိုဘဏ်ရဲ့ နိုင်ငံခြားငွေလဲဈေးကွက် ဖွင့်ပေးလိုက်တယ်ဆိုတဲ့ ဒီဇင်ဘာ ၅ ရက်နေ့ ထုတ်ပြန်ချက် ထွက်ပေါ်လာပြီးနောက်ပိုင်း အတက်ဘက်ကို ပိုမို ရောက်ရှိနေတာ ဖြစ်ပါတယ်။ အဲဒီနေ့မှာပဲ ငွေလဲဈေးကွက် လှုပ်ခတ်ခဲ့ပြီး ဈေးနှုန်းတွေ အတက်အကျမငြိမ် ဖြစ်ခဲ့ပါတယ်။
တပတ်အတွင်း အမေရိကန် တဒေါ်လာ ၃၅၀၀ ကျပ်ဝန်းကျင်ကနေ ၃၆၀၀ နီးပါးအထိ မြင့်တက်ခဲ့သလို ထိုင်းတဘတ်ကို ၉၆ ဒသမ ၆၁ ကျပ်ဝန်းကျင်မှ ၁၀၀ ကျပ်ဝန်းကျင်အထိ တက်ခဲ့ပါတယ်။ အဲ့ဒီ့လိုပဲ တရုတ်ယွမ် ၄၇၂ ကျပ်ကနေ ၄၈၅ ကျပ်အထိ၊ စင်ကာပူဒေါ်လာ ၂၅၂၅ ကနေ ၂၆၀၀ နီးပါးအထိ မြင့်တက်ခဲ့သလို အိန္ဒိယရူပီးကတော့ ၄၀ ဒသမ ၈၂ ကနေ ၄၂ ဒသမ ၃၇ အထိ မြင့်တက်ခဲ့ပါတယ်။
“လက်ရှိမှာ ဒေါ်လာဈေးက ၃၅၀၀ ကျော်နဲ့ အမြင့်ဈေးမှာပဲ အတက်အကျ ဖြစ်နေတယ်။ ဈေးမငြိမ်သေးဘူးပေါ့။ မနေ့ကတော့ ၃၅၃၀ ၊ ဒီနေ့ ၃၅၅၀ ပြန်ဖြစ်နေတယ်။ ဆက်တက်မလား၊ ပြန်ကျလာမလား ဆိုတာကတော့ တပ်အပ်ပြောလို့မရသေးဘူး။ စောင့်ကြည့်ရဦးမယ်” လို့ နိုင်ငံခြားငွေကြေး ရောင်းဝယ်သူတယောက်က ပြောပါတယ်။
ဒီကနေ့ ဒီဇင်ဘာ ၁၁ ရက်မှာ စင်္ကာပူဒေါ်လာ ၂၅၇၅ ကျပ်ဝန်းကျင်၊ ထိုင်းဘတ် ၉၇ ဒသမ ၅၆ ကျပ်ဝန်းကျင်၊ အိန္ဒိယရူပီး ၄၁ ဒသမ ၆၉ ကျပ်ဝန်းကျင်၊ တရုတ်ယွမ် ၄၇၅ ကျပ်ဝန်းကျင် ရှိနေပါတယ်။
လက်ရှိ ဈေးကွက်အတွင်း စက်သုံးဆီ ပြတ်လပ်နေဆဲ ဖြစ်ပေမယ့် ဆီဈေးတွေကတော့ ဆိုင်တွေမှာ အချိန်ကြာ တန်းစီ စောင့်ဆိုင်းနေရတဲ့ လူထုကို နှစ်သိမ့်တဲ့အလား အနည်းငယ် ပြန်ကျနေပါတယ်။
စက်သုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီအနေနဲ့ ဒီဇင်ဘာ ၁ ရက်ကနေ ၇ ရက်အထိ 92 အောက်တိန်း တလီတာကို ၂၅၁၀ ကျပ် သတ်မှတ်ခဲ့ပေမယ့် ၈ ရက်နေ့မှာတော့ ၂၄၆၅ ကျပ် သတ်မှတ်ခဲ့တဲ့အတွက် တလီတာ ၄၅ ကျပ်လောက် ပြန်ကျလာတာကို တွေ့ရပါတယ်။
အဲ့ဒီ့လို ဆီဈေးကျလာပေမယ့် ဈေးကွက်အတွင်း ဆီပြတ်လပ်နေဆဲဖြစ်ပြီး အချိန်ကြာ တန်းစီစောင့်ဆိုင်းနေရမှုတွေ ဖြစ်ပေါ်နေဆဲပါ။ စက်သုံးဆီရရှိဖို့အတွက် စောင့်ဆိုင်းနေရတဲ့ ကားတန်းကြီးဟာ တနေ့ထက်တနေ့ ပိုမို ရှည်လျားလာပြီး မိုးမလင်းခင်ကတည်းက စောင့်ဆိုင်းနေရတဲ့ ကားတန်းတွေအကြားမှာ ပဋိပက္ခတွေလည်း ရှိခဲ့တာမှာ ဆီရောင်းသူနဲ့ ဝယ်သူအကြား ခိုက်ရန်ဖြစ်ပွားခဲ့တဲ့ မြေနီကုန်း Denko ဆီဆိုင်ကလို ဖြစ်စဉ်တွေကိုပါ မြင်တွေ့ရပါတယ်။
“တနေ့တနေ့ ဆီတန်းစီရတာ အတော်ကိုစိတ်ကုန်နေပြီ။ မနေ့က ၂ နာရီခွဲလောက်ထပြီး သင်္ဃန်းကျွန်း BOC နားက 360 မှာ သွားတန်းစီနေတာ။ မနက် ၇ နာရီခွဲအထိ စောင့်ပြီး မရခဲ့ဘူး။ မေးတော့လည်း ဝန်ထမ်းတွေက မသိဘူးပဲဖြေနေတာနဲ့ လှည့်ပြန်ခဲ့ရတယ်။ တချို့ဆိုင်တွေဆို ဒီဇယ်ပဲရောင်းမှာတဲ့၊ ဓာတ်ဆီ မရှိဘူးတဲ့။ ဒီဆီကြောင့် အတော်ကို ဒုက္ခရောက်နေကြတာပါ။ ဘာမှ လုပ်လို့မရဘူး။ မနက်အစောကြီးကတည်းက သွားပြီးတန်းစီတာတောင် အဆင်ပြေချင်မှ ပြေတာ” လို့ အငှားယာဉ်မောင်းတယောက်က ပြောပါတယ်။
လက်ရှိ ဖြစ်ပေါ်နေတဲ့ စက်သုံးဆီ ဈေးနှုန်းတွေကတော့ ရန်ကုန်မြို့မှာ အောက်တိန်း 92 တလီတာ ၂၄၆၅ ကျပ်၊ 95 တလီတာ ၂၅၇၅ ကျပ်နဲ့ ဒီဇယ်တလီတာ ၂၁၁၅ ကျပ်၊ ပရီမီယံဒီဇယ် တလီတာ ၂၂၇၀ ကျပ်၊ မန္တလေးမြို့မှာ အောက်တိန်း 92 တလီတာ ၂၅၁၅ ကျပ်၊ 95 တလီတာ ၂၆၂၅ ကျပ်နဲ့ ဒီဇယ်တလီတာ ၂၂၆၀ ကျပ်၊ ပရီမီယံဒီဇယ် တလီတာ ၂၃၁၅ ကျပ်၊ နေပြည်တော်မှာ အောက်တိန်း 92 တလီတာ ၂၅၁၀ ကျပ်၊ 95 တလီတာ ၂၆၂၀ ကျပ်နဲ့ ဒီဇယ်တလီတာ ၂၂၆၀ ကျပ်၊ ပရီမီယံဒီဇယ် တလီတာ ၂၃၁၅ ကျပ် သတ်မှတ်ထားပြီး အရင်တပတ်ကထက် ဈေးအနည်းငယ် ပြန်လည် ကျဆင်းလာတာ ဖြစ်ပါတယ်။
