Day: August 25, 2022

ဆိုးလ်၊ သြဂုတ်-၂၅-၂၀၂၂ မျိုးဆက်(VOM) တောင်ကိုရီးယားနိုင်ငံရဲ့ ကလေးမွေးဖွားမှုနှုန်းဟာ အနိမ့်ဆုံးကျဆင်းသွားခြင်းနဲ့အတူ ကမ္ဘာ့ပေါ်မှာ ကလေးမွေးဖွားမှုနှုန်း အနိမ့်ဆုံးနိုင်ငံအဖြစ် မှတ်တမ်း၀င်သွားပါတယ်။ နိုင်ငံရဲ့ ကလေးမွေးဖွားမှုနှုန်းဟာ အမျိုးသမီးတဦးကို ကလေးတဦးနှုန်းမွေးဖွားတဲ့ ၂၀၁၈ ခုနှစ်က နှုန်းထက် ပထမဆုံးအကြိမ်ကျဆင်းသွားတာဖြစ်ပါတယ်။ မွေးဖွားမှုနှုန်းဟာ ယခင်နှစ်ကထက် ၀ ဒသမ ၈၁ ရာခိုင်နှုန်းကျဆင်းသွားပြီး ယမန်နှစ်ကထက် သုံးမှတ်ကျဆင်းသွားကာ ခြောက်နှစ်ဆက်တိုက် ကျဆင်းမှုလည်းဖြစ်တယ်လို့ အစိုးရက ထုတ်ပြန်တဲ့ ကိန်းဂဏန်းတွေမှာ ဖော်ပြထားပါတယ်။ ကမ္ဘာ့အတိုးတက်ဆုံးသောနိုင်ငံတွေရဲ့ ပျှမ်းမျှကလေးမွေးဖွားမှုနှုန်းဟာ ၁ ဒသမ ၆ ရှိတာကြောင့် တောင်ကိုရီးယားရဲ့ မွေးဖွားမှုနှုန်းက အလွန်ကျဆင်းနေတာဖြစ်ပါတယ်။ ၁၉၇၀ ပြည့်နှစ်တွေအတွင်းမှာတော့ တောင်ကိုရီးယားအမျိုးသမီးတဦးဟာ ပျှမ်းမျှကလေးလေးယောက် မွေးဖွားခဲ့ပါတယ်။ ကမ္ဘာ့နိုင်ငံတွေအနေနဲ့ ရွှေ့ပြောင်းအခြေချသူတွေမပါ၀င်ဘဲ နိုင်ငံ့လူဦးရေကို ထိန်းသိမ်းဖို့ရာမှာ စုံတွဲတတွဲကို ကလေးနှစ်ဦး မွေးဖွားဖို့လိုအပ်ပါတယ်။ Ref: BBC Photo:AFP #voiceofmyanmar #VOM #ဆိုးလ်

ဆိုဖီယာ၊ သြဂုတ်-၂၅-၂၀၂၂ မျိုးဆက်(VOM) ဆယ်ကျော်သက် လေယာဉ်မှူးတစ်ဦးဟာ လေယာဉ်ငယ်တစင်းနဲ့ ကမ္ဘာပတ် ပျံသန်းနိုင်တဲ့ အသက်အငယ်ဆုံးသူဖြစ်လာပါတယ်။ အသက် ၁၇ နှစ်အရွယ် မက်ခ်ရုသာဖို့ဒ်ဟာ နိုင်ငံပေါင်း ၅၂ နိုင်ငံကိုဖြတ်ကာ ငါးလကြာပျံသန်းခဲ့ပြီးနောက် သြဂုတ် ၂၄ ရက်မှာတော့ ဘူလ်ဂေးရီးယားနိုင်ငံ ဆိုဖီယာမြို့မှာ ဆင်းသက်ခဲ့ပါတယ်။ ဗြိတိန်မိဘနှစ်ဦးမှ မွေးဖွားခဲ့ပေမယ့် ဘူလ်ဂေးရီးယားတွင် ကြီးပြင်းခဲ့သူ မက်ခ်ဟာ သူ့ရဲ့ခရီးစဉ်အတွင်း ဆူဒန်မှာ သဲမုန်တိုင်းနဲ့ကြုံတွေ့ခဲ့ရပြီး လူမနေတော့တဲ့ ပစိဖိတ်ကျွန်းပေါ်မှာလည်း တစ်ညတာနေထိုင်ခဲ့ရပါတယ်။ တကိုယ်တော်ပျံသန်းခြင်းအတွက် ယခင်ကစံချိန်တင်ထားခဲ့သူမှာ ဗြိတိန်ဆယ်ကျော်သက် ထရာဗစ်လဒ်လိုဖြစ်ပြီး ရက်ပေါင်း ၁၅၀ ကြာမြင့်တဲ့ သူ့ရဲ့ခရီးစဉ်ပြီးဆုံးချိန်မှာ အသက် ၁၈ နှစ်သာရှိပါသေးတယ်။ မက်ခ်ရုသာဖို့ဒ်ရဲ့ အစ်မဖြစ်သူ ဇာရာဟာလည်း လေယာဉ်ငယ်နဲ့ ကမ္ဘာပတ်ပြီး တကိုယ်တော်ပျံသန်းခဲ့တဲ့ အသက်အငယ်ဆုံးအမျိုးသမီးဖြစ်ပါတယ်။ Ref: BBC Photo:Reuters #voiceofmyanmar #VOM #ဆိုဖီယာ

ကိယက်ဗ်၊ သြဂုတ်-၂၅-၂၀၂၂ မျိုးဆက်(VOM) ယူကရိန်းကို ရုရှားက ကျူးကျော်တိုက်ခိုက်မှု ခြောက်လမြောက်နေ့မှာ ယူကရိန်းရှိ ရထားဘူတာရုံကို ရုရှားက ဒုံးကျည်နဲ့တိုက်ခိုက်မှုကြောင့် ၂၂ ဦးသေဆုံးသွားပါတယ်။ နိုင်ငံအရှေ့ပိုင်းမှာရှိတဲ့ Chaplyne မြို့မှာဖြစ်ပွားခဲ့တဲ့ တိုက်ခိုက်မှုအတွင်း လူငါးဦးဟာ ကားတစီးထဲမှာတင် မီးလောင်သေဆုံးခဲ့ပြီး ၁၁ နှစ်အရွယ် ကလေးငယ်တဦးလည်းပါ၀င်ပါတယ်။ တိုက်ခိုက်မှုကြောင့် ခရီးသည်တင်ရထားတွဲလေးတွဲ မီးလောင်ကျွမ်းခဲ့ပြီး သေဆုံးသူအရေအတွက် မြင့်တက်လာနိုင်တယ်လို့ ယူကရိန်းဘက်ကပြောပါတယ်။ ဒီတိုက်ခိုက်မှုနဲ့ပတ်သက်ပြီး ယူကရိန်းသမ္မတ ဇီလန်စကီးက ကုလသမဂ္ဂလုံခြုံရေးကောင်စီအစည်းအဝေးမှာ ထုတ်ဖော်ပြောကြားခဲ့ပြီး လူ ၅၀ ကျော်ဒဏ်ရာရရှိခဲ့တယ်လို့ ဆိုပါတယ်။ ရုရှားဘက်ကတော့ ဒီကိစ္စနဲ့ပတ်သက်ပြီး မှတ်ချက်ပြုပြောဆိုတာမရှိသေးပါဘူး။ အရပ်သားပစ်မှတ်တွေကို တိုက်ခိုက်တယ်ဆိုတဲ့ကိစ္စကိုလည်း ရုရှားဘက်က ကြိမ်ဖန်များစွာ ငြင်းဆိုထားပါတယ်။ ဧပြီလအတွင်းကလည်း ယူကရိန်းရှိ ရထားဘူတာရုံတခုကို ရုရှားက တိုက်ခိုက်မှုကြောင့် လူ ၅၀ ကျော်သေဆုံးခဲ့ပါတယ်။ Ref: BBC Photo: Reuters #voiceofmyanmar #VOM…