Day: February 17, 2023

ဝါရှင်တန်၊ ဖေဖော်ဝါရီ-၁၇-၂၀၂၃ မျိုးဆက်(VOM) အမေရိကန်ကမ်းရိုးတန်းမှာ တရုတ်သူလျှိုဘောလုံးကို ပစ်ချခဲ့ခြင်းနဲ့ပတ်သက်ပြီး တရုတ်နိုင်ငံကို တောင်းပန်မည်မဟုတ်ဘူလို့ အမေရိကန်သမ္မတ ဂျိုးဘိုင်ဒင်က ဖေဖော်ဝါရီ ၁၆ ရက်မှာ ပြောပါတယ်။ အဲဒီမိုးပျံပူပေါင်းကို ထောက်လှမ်းရေးအတွက် အသုံးပြုထားတာဖြစ်ပြီး မြောက်အမေရိကမှာ ပစ်ချခဲ့တဲ့ အခြားဘောလုံးသုံးခုကတော့ ပြည်ပနိုင်ငံတွေရဲ့ ထောက်လှမ်းရေးအလို့ငှာအသုံးပြုတဲ့အရာတွေ မဟုတ်ကြောင်း သူကပြောပါတယ်။ ဒီဖြစ်စဉ်တွေနဲ့ပတ်သက်ပြီး တရုတ်သမ္မတရှီကျင်းပင်နဲ့ များမကြာမီဆွေးနွေးသွားမယ်လို့ သမ္မတဂျိုးဘိုင်ဒင်ကပြောပါတယ်။ အမေရိကန်အနေနဲ့ အလားတူအရာ၀တ္ထုတွေကို ထောက်လှမ်းနိုင်စွမ်း ပိုမိုကောင်းမွန်လာကြောင်း သူကဆိုပါတယ်။ မိုးပျံပူပေါင်းဟာ မိုးလေ၀သအချက်အလက်တွေရယူဖို့အတွက် အသုံးပြုခြင်းဖြစ်ပြီး သူလျှိလုပ်ဖို့ မဟုတ်ကြောင်း တရုတ်နိုင်ငံဘက်က ငြင်းဆိုထားပါတယ်။ ဒါပေမယ့် အမေရိကန်ကတော့ ဒါဟာ သူလျှိုလုပ်ရာမှာ အသုံးပြုခဲ့တာလို့ အခိုင်အမာပြောထားပါတယ်။ ဒီကိစ္စနဲ့ပတ်သက်ပြီး အမေရိကန်က တရုတ်နဲ့ ဆက်လက်ဆွေးနွေးနေပြီး မိမိတို့အနေနဲ့ စစ်အေးတိုက်ပွဲသစ်ဖြစ်ပွားလိုခြင်းမရှိကြောင်း အမေရိကန်သမ္မတဂျိုးဘိုင်ဒင်က ထုတ်ဖော်ပြောဆိုထားပါတယ်။ Ref:BBC #voiceofmyanmar #VOM #ဝါရှင်တန်

ပေကျင်း၊ ဖေဖော်ဝါရီ-၁၇-၂၀၂၃ မျိုးဆက်(VOM) တရုတ်နိုင်ငံက ထိပ်တန်းရင်းနှီးမြုပ်နှံသူ ဘီလျှံနာစီးပွားရေးငန်းရှင်တဦး အဆက်အသွယ်မရဘဲ ပျောက်ဆုံးနေကြောင်း သူ့ရဲ့ကုမ္ပဏီက ဖေဖော်ဝါရီ ၁၆ ရက်မှာ သတင်းထုတ်ပြန်ထားပါတယ်။ သူဟာ China Renaissance Holdings အမှုဆောင်အရာရှိချုပ် ဘိုဖန်ဖြစ်ပြီး မကြာသေးမီရက်ပိုင်းအတွင်းက ဆက်သွယ်လို့မရဘဲ ပျောက်ဆုံးနေကြောင်း ကုမ္ပဏီရဲ့ ထုတ်ပြန်ချက်မှာ ဖော်ပြထားပါတယ်။ မစ္စတာဘိုဖန်ကို ဆက်သွယ်လို့မရတော့ကြောင်း စတော့စျေးကွက်ကို အသိပေးပြီးနောက် ဟောင်ကောင်စတော့စျေးကွက်မှာ ကုမ္ပဏီရဲ့ရှယ်ယာတန်ဖိုးဟာ ၅၀ ရာခိုင်နှုန်းထိ ကျဆင်းသွားပါတယ်။ သူပျောက်ဆုံးသွားတဲ့ နေ့ရက်အချိန်ကို ကုမ္ပဏီက ထုတ်ပြန်ခြင်းမရှိပေမယ့် သူ့ကို၀န်ထမ်းတွေက အဆက်အသွယ်မရရှိတော့တာဟာ နှစ်ရက်ကြာမြင့်ပြီဖြစ်ကြောင်း စီးပွားရေးသတင်းဂျာနယ် ခိုင်ရှင်က ရေးသားဖော်ပြထားပါတယ်။ ကုမ္ပဏီရဲ့ဥက္ကဌနဲ့ အမှုဆောင်အရာရှိချုပ်ဖြစ်သူ မစ္စတာဘိုဖန်ဟာ China Renaissance Holdings ကို၂၀၀၅ ခုနှစ်မှာ တည်ထောင်ခဲ့တာဖြစ်ပါတယ်။ Ref:BBC #voiceofmyanmar #VOM #ပေကျင်း

ပြုံးယမ်း၊ ဖေဖော်ဝါရီ-၁၇-၂၀၂၃ မျိုးဆက်(VOM) အမေရိကန်နဲ့ တောင်ကိုရီးယားတို့ ပူးတွဲစစ်ရေးလေ့ကျင့်ဖို့ ပြင်ဆင်နေချိန်မှာ မကြုံစဖူးပြင်းထန်တဲ့ တုံ့ပြန်မှုနဲ့ ရင်ဆိုင်ရမယ်လို့ မြောက်ကိုရီးယားက ခြိမ်းခြောက်လိုက်ပါတယ်။ မြောက်ကိုရီးယားရဲ့ ကြီးထွားလာတဲ့ ဒုံးကျည်နဲ့ နျူကလီးယားခြိမ်းခြောက်မှုတွေကို ကာကွယ်ဖို့ကြိုးပမ်းမှု တစိတ်တပိုင်းအဖြစ် တောင်ကိုရီးယားနဲ့အမေရိကန်တို့က ပူးတွဲစစ်ရေးလေ့ကျင့်ဖို့ ပြင်ဆင်နေတာဖြစ်ပြီး ဒီကိစ္စအပေါ် မြောက်ကိုရီးယားက အခုလိုက်သတိပေးလိုက်တာဖြစ်ပါတယ်။ အမေရိကန်ဟာ တင်းမာမှုတွေမြင့်တက်ဖို့ တွန်းအားပေးနေပြီး မြောက်ကိုရီးယားကို ဖိအားပေးဖို့ ကုလသမဂ္ဂလုံခြုံရေးကောင်စီကို လက်နက်သဖွယ်အသုံးပြုနေကြောင်း မြောက်ကိုရီးယားနိုင်ငံခြားရေး၀န်ကြီးဌာနက ထုတ်ပြန်ထားပါတယ်။ မြောက်ကိုရီးယားဟာ ယခုနှစ်အတွင်း ပုံမှန်လုပ်ဆောင်မှုတွေကလွဲပြီး အထူးစစ်ရေးလှုပ်ရှားမှုတွေ မလုပ်ခဲ့ကြောင်း၊ အမေရိကန်နဲ့မဟာမိတ်တွေရဲ့စစ်ရေးလေ့ကျင့်မှုဟာ ဆိုးရွားနေတဲ့ တင်းမာမှုတွေကို မီးလောင်ရာလေပင့်ဖြစ်စေကြောင်း ထုတ်ပြန်ချက်မှာ ဖော်ပြထားပါတယ်။ အမေရိကန်နဲ့ တောင်ကိုရီးယားတို့အနေနဲ့သူတို့ရဲ့ စစ်ရေးလေ့ကျင့်မှုကို ဆက်လက်လုပ်ဆောင်မယ်ဆိုရင် မကြုံစဖူးပြင်းထန်တဲ့ တုံ့ပြန်မှုနဲ့ရင်ဆိုင်ရလိမ့်မယ်လို့ မြောက်ကိုရီးယားနိုင်ငံခြားရေး၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ Ref:Reuters #voiceofmyanmar #VOM #ပြုံးယမ်း